【胡說八道真情假期】閨蜜出遊勁開心 孕婦杏兒激動嗌肚痛
撰文：洪曉璇
出版：更新：
三個女人一個墟，「胡說八道會」6個人加埋威力應該大多十倍。胡杏兒、胡定欣、黃智雯、姚子羚、李施嬅、胡蓓蔚喺TVB工作相識繼而成為閨蜜，呢次「假公濟私」以拍攝旅遊節目為名，一班姐妹齊齊出遊為實。剛播出第一集《胡說八道真情假期》，兩個字形容晒：「真」同埋「嘈」﹗
六位都係一線花旦及主持，要度期俾佢地齊齊離港兩星期當然唔係件容易嘅事，節目一開始花咗三分鐘剪輯旅程精華片段，再用多2分鐘俾PA出場---睇下幾咁落力度期去促成呢個旅程。黃智雯出發前鬧出「放飛機」疑雲，點知原來係個局，當大家喺機場貴賓室見到佢時即時尖叫，成堆感動到喊，大肚婆杏兒仲激動到嗌肚痛，姐妹情深真情流露。
飛抵澳洲後佢地去到入住嘅湖畔酒店，到處參觀時佢地盡顯港女本色，見到按摩池要尖叫，浴室毛巾架識發熱又尖叫，攪到胡蓓蔚都不禁反白眼話佢地似「農民」，大驚小怪。黃智雯特別為杏兒排練「孕婦大乳操」，五位戴上假孕肚齊齊摸胸跳舞，又一輪嘈到拆天。胡定欣、李施嬅、黃智雯三個人齊齊逼入按摩浴缸倒奶倒花瓣浸浴，姚子羚更裸背做SPA，連杏兒都笑言「立花子羚唔係浪得虛名」﹗
+3