【專訪】如花李健仁棄做餐飲CEO　轉撈電影場記：同地盤一樣辛苦

出生於演藝世家的李健仁，父親是邵氏知名的攝影師，從小在片場打滾，不過由於爸爸認為「做過這行的，沒人希望孩子將來還做，實在是太辛苦。」所以他被迫選擇了飲食業，直到創出了一番成績，他再轉投電影圈，由場記做起，十多年時間，他做過製片、導演，目前正積極培訓新導演，總之大有大做，小有小做。

飲食業雖然是被迫選擇，但李健仁也沒有玩玩下，他擔任顧問的「唐宮」，92年於中國開業，11年於香港上市。雖說「好有滿感足」，但李健仁對電影也十分迷戀，放棄高薪厚職，由零人工的場務做起。在周星馳的引薦下，他在高志森公司做起場記，同時還擔任攝影助理、副導演及製片等工作。「一開始想做製片，因為都係管數，但高志森詰我識字，叫我做場記先。」那年代的場記，要記低演員的對白，用作之後的配音，遇上要連戲的場口，用相機拍下整個環境，連夜曬菲林，待翌日開工時百分百還原現場，一切就如父親所說「好辛苦」。「其實做電影同做地盤一樣，好似《大話西遊》時，整個山頭都要打燈，你話死唔死？」李健仁不用打燈，因為國家有更重要的任務給他：牛魔王。每天花上4小時化妝，拍攝完之後，他又再去幫手幕後製片的部分，如果唔係愛，又點可以捱到今日？
 

北上初期，李健仁選擇了由製片一職做起，他說只要跟著規舉去做，很少會撞板，最多只會被拖數或搵笨。「有啲戲叫我做幕後，話比多少少做埋幕前，我寧願唔做，比得又唔係多。」他說無論如揀，都會是幕後，因為滿足感更大，就好似在《唐伯虎點秋香》中與星爺鬥過不停的華夫人一角，原來是由李健仁親自邀請她演出的。「佢本身唔拍戲，但我細個時佢好照顧我，所以我打電話比人。」經典毒藥「含笑半步釘」、「一日冚包散」成了港人的集體回憶，正正就是李健仁口中所說「搵乜演員去做呢個角色，如果中咗，會yeah！」

提到星爺近年不時與昔日的拍檔反目，李健仁沒有多想就說：「唔會，佢好多朋友，係啲人誤會佢，他在片場只要一入戲就好難叫醒，飯都唔食，呢行點會唔合作，名同利，我拎舊錢比你，唔信無合作囉。」原來一切也是錢作怪！李健仁又再深入的分析。「佢係導演，你就要聽晒，因為個畫面係佢寫，導住你嚟演係好應該。」多得了周星馳與劉鎮偉，令李健仁明白了什麼是導演，他們會將自己想要的，清晰地表達、甚至示範一次。對於外界的種種傳聞，李健仁認為一切都要「包容與理解」，他還打趣說：「就好似我一年咁少返屋企，太太以為我有第二個咪死 。」