【雜警奇兵】周日連播兩小時係咩玩法？　黃智雯開LIVE宣傳自救

呢個年頭藝人要宣傳，唔可以再被動等安排，主動出擊方為上策。劇集《踩過界》被放到星期六日晚播出，令劇迷追看性大減，隨住大結局播出，周末晚上戰線又有新變動。星期六晚不再播劇，回復綜藝節目天下，《流行經典50年》由星期日搬到星期六晚9點30分，至於星期日晚則連播兩集新劇《雜警奇兵》。相對《使徒行者2》同埋《老表畢業喇！》強力宣傳，《雜警奇兵》可謂無聲無息，要靠演員自救。

輕輕鬆鬆鬧劇有時都幾收歡迎，唔使多用腦估估吓，啱晒放工休息時睇。點知呢套戲無聲無息推出，大家點知？係由女主角黃智雯，以劇中角色Laser姐大肚造型，自己喺bigbig channal開live宣佈9月24號起2030至2230，連播兩小時。到底係有好嘢要擺bigbig channal搶Focus，定係無人理要靠自己宣傳，真係要佢地先知啦。

最近終於有D宣傳片播吓，比較深印象嘅一條，係影住房入面一塊白板，上面釘住苗僑偉、陳豪、黃翠如等人喺《使徒行者2》嘅造型相片，用錯縱複雜嘅線連起，突然窗簾被拉埋，黃智雯同黃心穎就話：「我想查大案呀﹗」EM……連宣傳片都要Crossover另一套劇，到底話新穎好呀，定係二奶命好呢？希望唔會又一套好劇變炮灰啦。