【踩過界】朱千雪累積EU感情　親手寫Yanice情深獨白：增加淒美感

無綫劇集《踩過界》今晚就播出大結局，劇中由王浩信飾演的文伸俠 (盲俠) 與朱千信飾演的戴天恩 (Yanice) 的愛情故事相信淒美，雖然千雪BB今次只是容串演出，但就很搶鏡。Yanice於上集死後至今一星期，網民依然好懷念她，尤其是她死後的一段深情獨白，未能在生前對盲俠說：「12年前我離開你，並唔代表我唔愛你，只係因為我留低會對你造成更大嘅傷害。我地嘅愛情雖然短暫，不過如果可以再揀多次，我依然會選擇去愛你。阿俠呀，對唔住呀，過去我無及時咁樣去愛愛錫你，對唔住呀。呢一刻我好想再次攬實你，喺你耳邊詳細咁同你講，我有幾愛你。」真的聽到不少觀眾眼濕濕呀。

原來這段獨白是出自千雪BB的手筆，她早前開live時就表示是她自己寫的。看來千雪BB不單止英文叻，中文都幾好文采喎。亦有網民就話這段真情剖白似是在回應《EU超時任務》王浩信飾演的渠頭對她飾演的糞箕笠所說的一段話：「對唔住呀，過去我無及時盡情咁去痛錫你...」大家都是講未能及時好好去愛惜對方，留下了最深的遺憾，好慘呀。香港01記者就訪問了千雪BB講返她當時是怎樣去構思這段如此感人的獨白，以及到底是否真的在回應返EU呢？

千雪BB表示：「係呀，係我自己寫，係導演話我知想搵一段嘢講Yanice要死喇，想我死嗰一刻，放返類似係我無機會講嘅說話，畀觀眾同盲俠聽，我就諗同浩信呢兩套劇嘅角色同經歷，會係作一句或者作一段咩出嚟？咁就問咗自己同啲幕後嘅同事意見，因為我中文唔好，最尾導演同監製都有執少少嘅，但係我最初係由自己個角色出發去諗。又唔好話我自己寫晒，我相信佢地係有改過我啲文法嘅，但係個意思係由我呢邊出發。」

她又承認劇本並沒有這一幕，是後來才應導演要求加上去的：「劇本從來係無呢段㗎，劇本淨係講我死咗，後來剪接時就覺得唔想我就咁死，就會想死咗後有啲咩講。因為timing唔啱，盲俠可能早5分鐘或者我遲10分鐘去，就可能係無呢樣嘢，成個過程無論係EU定係踩過界我地個theme都係時間唔啱囉，即係bad timing，好喇，咁發生左咁多嘢係咪其實真係bad timing呢？其實唔係嘅，因為Yanice從來都係一路咁去愛盲俠嘅，或者係一路以嚟雖然可能似bad timing，爸爸唔鍾意，但其實我係無真係離開過你嘅，咁呢啲就要係喺嗰個時候講返出嚟囉。如果唔係導演叫我諗，我係無諗過可以咁樣用呢一啲嘢去增加嗰個淒美感嘅。」

最後，問到千雪BB對於網民話她似是回應返EU，她說：「其實當然主要係Yanice同盲俠嘅感情線，但我亦都相信監製同導演同埋編劇寫嘅時候，寫Yanice同盲俠都係因為有EU嗰兩個角色嘅存在，咁所以其實無論點都好，好難所謂撇得甩嘅，但係就唔係特別回應任何嘢，我覺得喺我心目中成件事係連貫囉，即係連住落去咁樣，就所有嘢都係加埋呀，累積呀咁樣去做。」原來千雪BB心底裡都想延續源自EU她與王浩信兩個角色的愛情，可惜來到《踩過界》依然未能開花結果，難怪有網民表示好期待兩人第三次合作做情侶會有圓滿結局。