【使徒行者2】古明華11月離巢唔做「親生仔」：仲有幾個月俾我諗
撰文：溫菁莉
出版：更新：
《使徒行者2》今晚隆重首播，除了有卓Sir苗僑偉、仲有「3豪」陳豪、袁偉豪、周柏豪，其中飾演有卓Sir旗下臥底嘅古明華(古佬)亦是去年不幸染上傳染病後首部復出拍攝嘅劇集，近日就有報導指古明華將唔再做TVB「親生仔」（即經理人合約），變成藝員合約。古明華接受《香港01》電話訪問時就表示，「考慮緊之後係要用咩形式合作，仲有幾個月諗，暫時都未定！」
有不少觀眾都認為，古佬自從五年前憑電視劇《巴不得媽媽》「蘇基」一角贏得台慶頒獎禮後「最佳男配角」獎，作品似乎比以前少，不少觀眾都替他可惜。但古佬就有另一個睇法，「我又唔覺得少咗作品，雖然量係少但質素好好。例如我做嘅角色係重要左，一年就唔可以好多部劇。相反我之前如果做嘅角色唔太重要，可能一年拍10-15部都唔出奇，而家我就一年拍3-4部咁。(係TVB近年算唔算捱得好辛苦？)好難講話辛唔辛苦，有時你捱得開心又唔覺得辛苦。反而開唔開心緊要啲，開心嘅時候你會覺得唔辛苦，唔開心就算做幾輕鬆嘅工作都覺得辛苦，就係咁樣。」但究竟當中發生了咩唔開心事時，古佬就未有透露。
提到近年有不少原本在TVB拍戲嘅演員都轉到內地發展，據知古佬前幾年亦有好多登台外快，收入亦相當不錯。古明華就話唔會因為見到其他人內地多工作就跟住北上，「究竟會唔會返大陸工作都未決定，邊度有工作就去邊度。」但古佬五年前贏得「最佳男配角」獎後，TVB就將其合約變成經理人合約，而登台工作當然要經TVB批准，多了掣肘之餘首當其衝當然係收入相比以前無咁多。問到隨着囡囡今年即將升大學，負擔應該減輕了不少，但他直言支出仍有好多，「佢都有返Freelance，雖然係大咗但又未嫁洗費都多，要整頭髮整面都要錢，啲錢都係我嘅，所以洗嘅錢會多啲。」