【專訪】金剛全盛月入近50萬　土豪式揮霍：如果慳慳哋樓都有幾層

台劇《麻辣鮮師》準備開拍電影版，憑該劇走紅，甚至以劇中角色名行走演藝界的金剛二話不說點頭接拍，他說感覺有點像重返母校，讓老師看看他這15年來的成績表。
08年隻身來港發展，捱過了無人無物的日子，金剛因《超級遊戲獎門人》而大受歡迎，高峰期月入近50萬養成他「一餐飯兩三千係基本」、「乜都買」的習慣，直到零節目在手，只靠底薪過活時，才深明花無百日紅的道理。

金剛以《麻辣鮮師》打開知名度，其後的通告藝人（即擔任綜藝節目嘉賓）生活，他說返一日休一日，而且可以現金出糧，其實幾開心，反觀來港後，擔任TVB8的主持，無朋友、唔識廣東話、收入低微，曾令他一度喊住問自己「點解要嚟香港」，公司一句「未爆騷唔可以請假」，連台灣都唔返得，唯有等同等。兩年後，因《超級遊戲獎門人》而打開了綜藝市場，主持、戲劇、廣告接踵而至，名利雙收，他說那時賺錢超容易，月入50萬不是夢，養成了買嘢唔睇價錢的習慣。「而家諗都覺得……唉！係揮霍同好蠢，那時食飯兩三千（元）係基本，唔覺得痛，係未揮霍？喜歡什麼都買，連有什麼用途都唔理，總之買咗先。」潮牌一系列的產品，全數入手絕不手軟，土豪一樣的行徑，他說時也不禁苦笑一番。「而家諗返，如果慳慳哋，樓都有幾層。」早前他撤離香港時，整理東西時不停冒出「我幾時買過啲？」疑問。

做土豪有朋友

14年《超級無敵獎門人 終極篇》後，加上負面新聞，令其工作量下降，收入減少，危機意識出現，但一切已經太遲，沒有儲蓄習慣的他，偶爾食平啲偶爾有朋友請食飯。「以前有啲朋友叫食飯，幾忙都一定到，但後來成日都話唔得閒，我成日都覺得我對人好，人哋會知道，但原來有啲人會認為係我一廂情願，所以算吧了，現在只會對兄弟無所謂，同唔太熟嘅可能AA制。」金剛說自己是那種就算被搵笨也只會疏遠對方，而不會當面拆穿，男女皆一視同仁：「我唔會覺得對方想在我身上得到什麼，除非好誇張，好多時都係朋友睇到出聲先。」

做一世mama boy

金剛做土豪時，雖然未有在港置業，但卻為了改善了家人的生活而在台灣置業，一邊廂大嗌「好彩」，一邊廂卻認為自己做得太少。「因為呢幾年我成日都不在他們身邊，錯過了太多東西，就好似我妹生小朋友，感覺有點失落。」去年，為了照顧媽媽而回流台灣，看似十分大男人的金剛說自己是mama boy，小時去旅行，包包永遠被塞滿一堆零食，到現在要出門，媽媽依然怕他會餓壞，他笑言就到算到50歲，媽媽這習慣也改不了。「因為爸爸唔識諗，所以好多嘢都要媽媽自己去承擔，以前我只係會顧自己，但而家會覺得無佢無我，想多啲時間陪佢，但暫停唔會帶佢一齊做工作，因為佢少少事都好緊張，我又唔鍾意她在旁指指點點……（下刪一百字）」
 

無力改變大台綜藝

簽約王祖藍的公司後，金剛主力國內以及台灣發展，對於大台的綜藝節目沒有多留意，跟他說連獎門人曾志偉都說港姐慘不忍睹時，他笑了一聲。「老實講我都好多年無睇TVB，就算《街坊廚神》我都少睇，可能公司政策在變，可能他們想試新東西。」他認為節目只要得到觀眾認同就是最好，獎門人出身的他認為同類型節目是must有的，因為香港生活壓力大，沒有東西比得上日能在家中大笑一番。「但呢樣嘢我控制唔到，我係小朋友，都係聽order做事。」他回想自己剛加入獎門人時，由唔多出聲到爭取每集一故事，過程有血有淚，拍攝前一晚，為了找好笑故事而花四、五小時上網，「要講到獎門人佢哋笑為止，其實佢哋肯比時間我做自己嘢，已經係好難得。」獎門人為他帶來了名利，也帶來了能傾訴心事的好友，金剛說直到現在，只要有問題，也會找曾志偉、錢嘉樂、洪天明等人商量。

場地提供：隆堡麗景酒店