【3日2夜】陳婉衡到遊巴塞 與壯男打沙排 被無上裝女郎搶鋒頭
TVB歷來有好多旅遊節目，近如澳門珠海，遠至南極非洲喜馬拉雅山，全個地球都差不多去勻，不過起用較新面孔，可以捧起一個又一個主持，仲做足百幾集添食至第三輯，《3日2夜》可算近年最成功嘅旅遊節目之一，最新一集有陳婉衡Alycia同大家去到巴塞隆拿，身為新一代TVB咪神，Alycia去到當地沙灘居然被一班無上裝曬太陽嘅女士搶晒鋒頭，Alycia都話大開眼界：「有機會我都想試下﹗」
由第一輯起，Alycia已經主持過多集《3日2夜》，同觀眾暢遊新加玻、紐西蘭、曼谷、首爾，呢次去到出名熱情奔放嘅巴塞隆拿，Alycia都揀咗一堆靚衫襯靚景，大部份都係露腰或低胸小背心：「自己都幾鍾意今次著嘅衫，大部份都係贊助，知我要去巴塞揀咗一堆適合當地嘅衫，另外有一兩套就係當地即買即著。」不過佢都非常醒目，唔係怕入室內會凍，而係到聖家堂等莊嚴地方要遮一遮呀。
睇《3日2夜》又點會少得泳衣上陣呢，呢次去到聖馬蒂區嘅沙灘，海岸線一直延伸至西班牙南部，Alycia身穿粉紅色比堅尼享受陽光與海灘，仲落場同猛男齊齊打沙灘排球，都算有板有眼㗎。佢仲發現嗰度有唔少女士都無上裝曬太陽，「聖馬蒂區嘅沙灘都有好多女仔無上裝，因為佢地話費事曬到有泳衣痕，佢地話歐洲好普遍，自己私底下未試過。其實都想試但唔夠膽喺人地面前試，可能將來有機會去個無人嘅島，又或者villa得自己一個有個泳池，都可能會試下，不過拍攝就唔好啦會好怕羞。」
睇節目播出見Alycia同當地人打成一片，同打沙排嘅猛男攬攬，又同地下鐵busking嘅男士一齊跳舞兼被錫手，咁有無艷遇先？「今次第一次去巴塞，當地嘅人真係好好好熱情同好nice，即使唔識嘅都會走埋嚟好主動傾偈，識咗一啲朋友，有男有女交換咗ig，自己都鍾意周圍識朋友，第時有機會再去當地，或者佢地嚟香港可以再約下見面。」