八爺欽點拍《張天志》　何遠東打到周身傷：靠雲南白藥止痛　　　

成日聽見怪獸家長話要「贏在起跑線」，先天條件加後天培養，之後條路就一定順風順水，若然只是如此簡單，無綫藝人何遠東，早應放棄了演藝這一條路，皆因他自小已經是肥仔，入到電視台要爭做主角，可說根本無可能，但當大部分肥仔都不敢胡思亂想，他卻讀演藝、入無綫做演員，不但等到了《心理追兇》中弒母肥仔的角色，讓他一夜爆紅被網上洗版談論，近日又進軍影壇，拍攝葉問電影系列中的《張天志》，要跟張晉對打過招，全靠他是一名有演技的肥仔。

說何遠東肥絕對沒有半點貶義成份，皆因這個確是他的商標特徵，八爺袁和平開拍《張天志》，要找一個肥仔的小流氓角色，助導就想起了他，何遠東接受《香港01》訪問表示，「佢哋開呢齣戲嘅時候，個角色要求係要肥仔，要係香港人，唔識打都唔緊要，但一定要做到戲嘅。助導就搵到我，推薦咗我上去俾導演揀，佢哋搵咗我以前嘅劇《梟雄》呀，因為都係拍返民初，舊底香港啲嘢，當然《心理追兇》嘅片都有，俾監製導演睇下，其實初時佢哋見都冇見過我架，又唔需要試戲，就俾咗個機會我。」

何遠東笑言始終拍電影，比起無綫薪酬當然有很大分別，但錢還是其次，有機會涉足影壇，導演還要是在荷里活也赫赫有名的袁和平，所以他拍攝時可用博晒命來形容，「一般有十組八組戲都算多啦，我依家有三十幾組戲，足足在佛山拍咗3個月，好多人聽到都叫我好好把握呢個機會。但我其實驚到飛起，尤其是拍打戲，好多場都冇得墊嘢，因為服裝嘅限制，只能用現有脂肪去頂住人哋啲拳腳，有幾場戲仲係真打，總之打得好真嘅，係同內地演員，有啲位真係避無可避，對打嘅場面八爺要求好高嘅，大家都盡量去做，當見到嘉穎都真打嘅時候，你都唔會揸流攤囉。」

「試過成個肚腩瘀晒囉！(冇人知你受傷？)武指會知嘅，佢哋送咗支雲南白藥俾我，冇傷及內臟嘅，都係唔覺意啫，大家都想逼真，只係拍嘅時候唔覺，瞓醒先知好痛。冇辦法，好想係八爺面前打得好啲，好想做好件事，拍十日、八日戲剪出嚟得幾分鐘，所以梗係想做好每一個鏡頭。

「坦白講我同張晉第一次合作，係片場見到佢我係好驚嘅，佢冇乜表情，好cool嘅，但識落佢原來好風趣，見我做錯咗，佢會講哎呀你仲乜咁快避呀，我都未打到你。你知啦拍嘅時候大家都好認真，個樣又好凶狠，但一cut機大家又係忍唔住笑，呢個係我估唔到嘅，佢係國際巨星，我只係地區性小星星。」

雖然拍打戲辛苦，但何遠東直言終於體驗到內地製作對藝人的尊重，而且有不少福利，單是以三餐來說已經非常講究，「我個劇組裡面，的確係招呼周到。例如會問我想食乜嘢，因為早午晚餐都可以點餸嘅，我哋可以每人揀四個餸，但我為咗連戲要keep住體重，電影好高要求架嘛，同埋要拍打戲要郁，所以我食菜唔准落油，唔食飯要食餃子，有時又要番茄炒蛋，或者炒多味瓜俾我食。仲有一樣估佢唔到，就係拍外景都有冷氣。(露天都有冷氣？)係呀，佢哋會抽條冷氣管出嚟，就算露天地方都可以涼到。」

無綫的小生花旦，有機會也紛紛向外闖，現時何遠東開始進軍大銀幕，又會否北望神州呢？「開始諗拍多啲電影，《心理追兇》之後，真係多咗人搵我，除咗《張天志》，仲有葉念琛嘅戲，佢成日都話我難度期，今次終於拍咗佢嘅賀歲片《我的情敵女婿》。(現時好多合拍片，會將基地移向內地嗎？)咁又唔會，中港兩邊走囉，又同TVB續咗約(部頭約)，要度啱時間拍囉，都係多線發展。」近日在螢幕前確是少見了何遠東，但10月尾的《降魔的》，他會再有突破演出，大家拭目以待啦。