【忽然少女心】KB亞馬遜遇粉紅河豚：世界好似變咗天堂

Kevin Boy（KB）同火火遠赴南美拍攝ViuTV新節目《真PK Trip》，挑戰神秘國度亞馬遜森林，同鱷魚、蛇王、食人魚為伴，又親嘗打藤、大蟻蟄咬等等，總之集集新鮮集集甘，有時真係睇到隔着個mon都嚇到個心離一離！而即將播出一集，又有正嘢，就係同極罕見嘅粉紅色河豚（The Amazon Dolphin）作近距離接觸。

粉紅河豚只分佈於亞馬遜流域，由於經常被捕殺，所以已面臨絕種危機。KB同火火隨節目去到亞馬遜森林，一心以為又要同鱷魚、蛇王困獸鬥，結果粉紅色河豚出現於眼前，向來man到爆嘅火火即時露出童真一面，更不停出手摸粉紅色河豚，而KB接受電話訪問時，似乎仲係好興奮：「落海一刻真係都好驚，因為最怕就係俾人幪眼，咩都睇唔到個人會極度恐慌，聽到有嘢fing到啲水個心離一離，到摸到其實都驚，但真係見到一瞬間，我個世界好似變咗天堂咁，因為咁大個仔都未試同海豚一齊游水，仲要喺亞馬遜，絕對係我人生一個好重要嘅回憶。」真男人都變了美少女，河豚的魅力叫人只可以寫一個字：服。