【鼎爺私房菜】李家鼎日日忙到凌晨4點　最低時薪2倍請人　

李家鼎 （鼎爺）因為主持無綫節目《阿爺廚房》人氣暴升，最近還於銅鑼灣開埋由他親自主理的「鼎爺私房菜」，自9月3日開張至今日日都fully booked，booking更已經排到明年，生意好到不得了，鼎爺同一班員工都忙到暈。既然人人做到無停手，咁當然要增加人手啦。近日網上就流傳一則「鼎爺私房菜」的招聘信息，內容係話「銅鑼灣，返15:00 - 01:00，$75/小時，蛇頭過數，貼士任收，6個位。」嘩，係香港現時法定最低工資時薪$34.5兩倍有多呀，不過就無講明是請什麼職位。如果做樓面，除了可以見到鼎爺，應該都可以見到不少藝人，因為不少藝人都是捧場客，好似羅霖同陳嘉寶日前就同大班朋友去幫襯過，仲即場直播了鼎爺炮製菜式的過程。如果做廚房，話唔定可以獲得鼎爺過兩招，又或者係從中偷下師。

香港01記者致電鼎爺問他有關這則招聘信息的詳情，鼎爺表示：「我唔理㗎喎，可能是請臨時工，這些是業務經理負責的，我只是負責廚房、下廚、出菜招呼客人同埋買食材，我要顧這些都已經忙到癲，晚晚都搞到凌晨3、4點先搞掂。如果我連請人這些事務都要理埋，我真係連睡覺的時間都無呀。（你會不會過兩招給你的徒弟？）唔好講話徒弟，大家師傅互相磨合，我就係咁煮㗎喇，他們鍾意的話咪跟我個煮法囉。」