陳展鵬被King Jer嘲亞視味濃　視帝返擊：對我而言即係人情味

陳展鵬 (煎pan) 的衣着打扮近日備受網民關注，King Jer娛樂台更開post指煎pan「衣著獨特，愛好銀器首飾和花花衫，有一種連鏹水都洗不走的亞視娘味。」，並附上大量煎pan歷年來的衣着圖輯，引起網民熱烈的討論，有1.5萬個like、心心同笑樣。不過煎pan就大方表示不介意被網民這樣說，還解釋亞視味對他而言是一份人情味。而講起個人的Styling，煎pan仲激罕地主動提起緋聞女友單文柔，話兩人會就時裝和Styling方面交流意見。

日前煎pan出席品牌活動時被問到可有留意King Jer的評論，原來他沒有留意，當記者給他看過該post和圖輯後，他即笑言：「有咁多人睇，都有佢嘅信服力。（唔會嬲？）唔會嬲，有啲相我自己都無，佢有咁多有心機搵我咁多相，我覺得佢好有心機，好有誠意，都達到一個宣傳效果，當宣傳囉，網上平台好自由，總會有人讚有人彈。我自己覺得當中有啲相幾靚吖，而有啲就係劇照嚟。」對於被指有陣鏹水都洗唔甩的亞視味，煎pan表示：「亞視味對我而言即係人情味，鏹水都洗唔甩嘅人情味。同埋英雄莫問出處，每個人都有他的經歷，有過去，邊度出身都不是問題。」

至於煎pan的衣着喜好，他說：「我鍾意舒服、自然和簡單，但簡單得耐有時都會悶，會想嘗試多啲元素嘅衣着打扮。着衫就好似拍戲咁，有好多唔同類型，要勇於嘗試，我仍需要時間去揣摩，不過我寧願花時間心機去揣摩我演的角色。」他又坦言本身好鍾意銀器飾物，小時候已覺得好有型，有情意結。

問到可有找造型師幫手襯衫，煎pan說：「之前都有搵，都轉咗幾個，但工作太忙，現在連休息的時間都唔夠。我近期有搵單文柔 (Phoebe) 幫手，我哋會在衣着打扮上交流意見，但我自己也有自己的固執。例如我好鍾意着闊褲，覺得好舒服，不過她就話依家唔興㗎喇，話唔襯我。（她敢講真話畀意見你？）敢，她說我一路做開電視台角色，衣着要正常、貼地些，造型方面要好小心，不同歌手可以配合舞台效果或歌曲唱片造型，演員較難打扮得好誇張，觀眾會先入為主，認為電視演員要平實貼地些。（Phoebe給你的意見有無用？）有，佢好勁㗎，在英國讀了5年fashion design，在香港都讀了4年，對時裝有好深認識，但她做兒童節目，形象要乾淨和有大姐姐感覺，我哋會互相交流意見，佢仲頭痛過我，明明好鍾意時裝但又要配合兒童節目童主持形象，她造型上的難度仲高我。做兒童節目都算是教育工作，要有好嘅形象，受小朋友鍾意。」