《戰狼II》原著小說開電視版　吳京未必拍網友講明唔想睇

吳京自導自演電影《戰狼II》，內地票房突破55億人民幣，成為內地史上最賣座嘅華語電影，既然有得賺，無理由唔賺盡佢，據《戰》嘅製片人韓颢透露，《戰狼II》原著小說《彈痕》嘅電視版權去年已經被賣下，而目前亦已積極籌備當中，預計出年會開拍。

自從穿越題材喺內地被禁之後，談情說愛似乎成為劇集唯一出路，但另一方面，以軍事為題材嘅劇集如《亮劍》、《士兵突擊》隨即應運而生，且有不錯的成績，令唔少投資者認為軍旅題材大有發展空間，再加上《戰狼II》票房屢創新高，唔通真係有錢唔賺咩？

《彈痕》主要描述一群第五類特殊部隊嘅職業生涯，其戰場由原始森林、戈壁沙漠到冰天雪地都有，聽落已經夠辛苦，再加上吳京為了演繹冷鋒一角，接受了特種部隊18個月訓練，要搵一個肯花時間同精力，兼有演技嘅男主角，真係談何容易！再加上製作人開出條件包括「必須要和劇組簽下與平時拍攝時間兩倍的檔期」、「期間不能接其他戲」等條件，令情況雪上加霜。至於網友對於電視版嘅反應亦似乎唔多好：「電影看夠了，沒必要再看一次電視劇。」、「一部電影能講完的故事，為什麼要拍成幾十集？」一盤盤冷水冷過冷鋒，投資者睇到的話，唔知會點諗。

雖然網友唔睇好《戰狼II》電視版，但又好齊心咁去諗到底邊位男星最適合做呢件事，有功夫底子嘅張晉、趙文卓、釋小龍等人通通上榜，而曾經演過《智取威虎山》、《湄公河行動》同《集結號》嘅張涵予亦都被提及，但首要條件係「年齡不設限」，其實講打得，香港區嘅樊少皇都唔弱，可以諗諗。