【電影新人】陳欣妍放棄穩定收入 北上學戲捱瞓木板床
睇完條片之後，除了諗起身邊某個女仔特別論盡之外，會否覺得片中女角都好大頭蝦？她叫陳欣妍（Shirley），今年24歲，是影壇新人！Shirley要向大家澄清，雖然有時候她有點論盡，會忘東忘西，不過工作時就會認真，尤其剛剛入行，她笑言一定會打醒十二分精神，幾面懵都會做落去。
初出道的Shirley，就拍過三套電影。接著9月，她的新片《我們的6E班》就會上映。不過，Shirley家境還不錯，大學時修讀廣告，好多人都覺得廣告雖然會日夜顛倒，但捱到就會搵到錢，其實好過做演員。為何之前演戲零經驗的Shirley有筍工不做，要做演員那麼辛苦呢？她就傻笑地說：「讀廣告的確係相對比較穩定，但係廣告對我嚟講係second choice，最重要係我嘅夢想，如果我而家唔去做，而機會就係我面前，不如就趁仲後生去試下，唔得先再算喇…」不過Shirley意志堅定，對自己的決定有信心，她續道：「我相信可以應付到嘅，希望可以做到落去。」或者影壇正需要有決心的新人。
Shirley為了做演員，特意到北京學戲，不過就衝動咗少少。回想起當時的「傻事」，她笑說：「上網見到北京有course，就同經理人講，咁佢就畀咗啲details我，之後我就好快，剩係帶咗個細篋上去。點知上到去，死喇，周圍嘅同學都帶齊晒被鋪，我就要瞓係木板床上面。不過啲同學仔都好好，見到我一個人咩都唔帶咁慘，都有借啲被鋪畀我。」讀了個多月，Shirley非常之刻苦耐勞，完全不覺得辛苦。除了北上學戲，她還有跟King Sir（鍾景輝）及黃秋生學戲，對住兩位嚴師，難免有點緊張，不過Shirley可以避過一劫，未試過被鬧：「佢有時鬧都係想鼓勵學生，所以就算鬧我都冇問題㗎！」
陳欣妍除了電影新人這個朵，還有「JW12億男友Tarzan前度」的稱號。之前她接受過傳媒訪問，講到與對方曾共度患難，因為Tarzan患重病，Shirley曾經專心照料他。雖然兩人最後因為性格不合而分開，男方的病已經痊癒，並已找到新的伴侶，但Shirley都衷心祝福他。事過境遷，Shirley不欲再提過去感情事，只希望可以專心工作，唔恨拍拖。若然真的要挑選伴侶，她說：「我會搵一個真係take care到我，性格好夾嘅男朋友。一來我真係好大頭蝦，好多時真係冇咩記性，如果佢會提一提我，又或者唔介意我咁粗心，已經好好。同埋我都好相信緣份，個時間一到大家無論點都會好夾。」不論點都好，或者因為之前經歷，Shirley都會為對方著想，並非一味要遷就她。