【周街訪．開學篇】小6暑期作業有幾難？　胡定欣要搵大學生幫手

不知不覺間已經黎到9月1號，一班莘莘學子又要同呢個一年一度嘅暑假講拜拜喇！講到開學，雖然小編已經離開校園好一陣子（其實係好耐～），不過開學前一日只會令我諗返起最唔想面對嘅，就係暑期作業！(掩面中..）點樣趕頭趕命清晒啲功課…
今次《香港01》就特別搵左視后胡定欣，宋熙年及鄭欣宜以及同一班大學生，考下佢地仲識唔識做暑期作業之外，仲會問下佢地細嗰做作業會遇到咩趣事？即刻去片！！！

胡定欣今次就抽到做「中文」科，佢一見到d題目都不禁深呼吸，最後仲要請槍叫埋助手幫手做，「其實我放低書包好耐喇，以前做暑期作業點都會做下嘅，唔會唔做嘅。仲好記得細個好鍾意暑期作業有得貼貼紙，唔知而家啲小朋友有冇得玩呢？」。至於宋熙年及鄭欣宜呢兩位讀「番書」嘅朋友，就話以前係外國讀書根本無暑期作業呢回事，其中欣宜仲話，「Summer緊係係放假去玩啦，而且以前學校功課都唔多，好快就做完！」做完暑期作業之後，最意外就係鬼妹仔鄭欣宜做英文題目時，竟然話有啲題目好難！答到「come」的過去分詞是甚麼，欣宜直接skip掉！她笑說：「多數母語叻個啲，反而本身唔知點解！如果你問我法文呢，我就講到畀你知！」真係令人好surprise！

至於一班大學生直言以前做暑期作業都係抄返黎，同埋覺得好無聊，但都有同學仔話好enjoy做暑期作業，因為覺得可以打好新一年嘅基礎！！其實近年有不少小學已經安排學生在暑假時，將功課量減低，最多只是會叫學生以攝影、遊記及網誌等形式，簡單記錄在暑假的所見所聞，這樣反而會令學生對面學習產生興趣，誓要還小朋友一個「真暑假」。不再會是只在開學前臨急抱佛腳地胡亂趕工，甚至「抄抄抄」。