麥雅緻陀7個月巨肚　老公張穎康將陪入產房：佢要睇住BB出世

麥雅緻出席TVB節目《嫁到這世界邊端》，腹大便便的她原來已經有咗七個月，並且準備十月開刀生B。至於是仔定女，麥雅緻就賣關子，表示希望九月與好友開個派對，到時再分享BB的性別。

麥雅緻今次懷有第二胎，比以前輕鬆：「有之前嘅經驗，心情都會放鬆啲，但身體上呢就比之前唔同，因為今胎大得快過上一胎，就負重多咗，但我自己嘅體重，就同之前差唔多。」大女知道自己做姐姐，心情都有所不同：「最初佢都唔係好知發生咩事，佢都會問咩嚟㗎？點解會有嘅？但後來佢都知道自己要做姐姐，都有唔同咗，人哋叫佢做妹妹，佢都話：『唔係！我係姐姐！』」

麥雅緻透露老公張頴康都會陪她入産房，睇住BB出世，不過張頴康目前都在台灣拍攝，回來到香港之後又會好快開劇。問到多一個B，將來開支會否大咗？麥雅緻表示：「都曾經有擔心過呢個問題，始終多咗一個BB，但係後來諗過，始終生過大女，都知道啲錢用係邊，同埋個女之前都有嘢可以留落嚟用，所以都唔係太大問題。」老公的角色就是要賺奶粉錢，「呢個一定要喇，生完之後，佢都想我休息下先，但之後間唔時都可以好似今日咁出下嚟，都開心嘅。」麥雅緻透露雖然初期都要湊B，但過了一段日子後，她都不會退下來。