【阿爺廚房】2萬蚊睇鼎爺排到明年　做私房菜年中無休辛苦過拍劇

香港不少人的核心價值，就係崇尚名牌，衣著打扮固然鍾意高檔貨，連對飲食都係崇尚品牌，只要有名廚光環，食店例必大排長龍，至於好不好食，都係排了才算，心中只有一句「執輸行頭慘過敗家」。Gordon Ramsay開的「Bread Street Kitchen & Bar」，又或者Jamie Oliver開的「Jamie's Italian」的長龍名單香港人排過嗎？實有嘅，只係小數囉。但這一期香港最紅的名廚，不是Jamie Oliver，或者地獄廚神Gordon Ramsay，而是之前主持《阿爺廚房》的李家鼎（鼎爺），仲紅到開埋「鼎爺私房菜」，真係估佢唔到。

雖然《阿爺廚房》第二季上星期已經播完，但仲有不少觀眾回味緊鼎爺的功架，又好羨慕譚玉瑛可以試到鼎爺手勢，有見及此，鼎爺親自開設私房菜於9月3日開張，但如果大家諗住walk in去捧場，咁就真係太天真啦，鼎爺現時的名氣，比起國際名廚半點也不輸蝕，以香港人心態，當然是一窩蜂湧去幫襯，現時訂枱已經排到去3個月後，即係話要歎到鼎爺手勢起碼要明年，咁話晒鼎爺都係本土代表，支持下都好應該嘅。

睇返鼎爺間私房菜的價錢，4人枱最低消費4千元，但很多網民都話能夠試到鼎爺手勢，價錢尚算合理，而最低消費2萬元的VIP房（14-16人）就可以睇到鼎爺親自下廚，而且菜館每晚只做7枱客，起碼可以慢慢食不用趕住埋單。鼎爺接受了《香港01》訪問，他笑着說：「係呀，book到出年，無法啦，多謝大家捧場，託賴啦。（平均每晚要招呼80人，是否全部由你烹調？）百分之八十我煮嘅，其他就話俾啲廚聽點樣煮，一個個step咁做。」

食客慕名而至，也是想試下鼎爺出品，鼎爺每日都要落場，確是幾考精神體力，連出名無日無夜的TVB拍劇都無得比，「同拍劇比？梗係呢樣辛苦啦，拍劇人哋準備好晒，我記對白之嘛，冇你嘅時候可以休息，呢啲就唔休息得架嘛。（年中無休？）不嬲都年中無休啦，差不多日日都見到我架啦。」鼎爺現時的聲勢，有網民就以Gordon Ramsay比較。鼎爺笑說：「煮嘢食無得比嘅，各有各嘅做法唔同。（網民話你係代表香港的名廚！）唔敢戴咁大頂帽呀，大佬。」不過鼎爺就話會否開分店至今未知，亦未有人聯絡他開拍《阿爺廚房》第三季，但現時鼎爺咁忙，真係分身乏術囉。