黃玉郎未婚妻ig鬧人唔知醜 緋聞女友Rachel反擊：有情緒病睇醫生
黃玉郎7月向比佢年紀細30幾年嘅女友Cass求婚成功，但67歲黃玉郎身邊一直有個傳過緋聞的林熹瞳（Rachel），Rachel更是黃玉郎工作上嘅伙伴，身為未婚妻嘅Cass於是醋意大發。
Cass喺ig狂數Rachel，又暗指對方係「滿口謊言的教徒」，Rachel終忍唔住留言反擊，並稱會考慮告佢誹謗。Rachel回應時指黃未婚妻屈得就屈，連佢家人都鬧埋，或會告對方誹謗。
先講下黃玉郎同Rachel關係先，黃玉郎曾經結過兩次婚又離婚。6年前Rachel成立環球傳奇影視娛樂有限公司，其後黃玉郎入股，而兩人喺2012年被影到十指緊扣撐枱腳，但咁多年嚟兩人都否認緋聞，而因為大家都係公司股東，當然會經常見面啦！可能因為咁，Cass就唔多高興。
而罵戰起因係因為一張照片，Rachel電話回應《香港01》時從頭講起：「有次event黃生同佢未婚妻都有出席，佢哋同股東大合照，我就同以往一樣影相同埋po上ig，我身為股東咁樣做係好正常，但係佢（Cass）就喺ig亂咁鬧。」Cass喺ig係咁寫:「好明顯……被對面偷拍了」，而hashtag咁樣寫「#借此利用別人淡化粉飾撇除曾經其關係的史實全世界都知道此地無銀三百兩是極其幼稚行徑」、「#滿口謊言的教徒」，即時辣㷫本身係基督徒嘅Rachel。
黃玉郎未婚妻Cass與林熹瞳ig對話內容：
Rachel喺Cass嘅ig留言發炮還擊：「即係咁，我係呢個地方工作了六年，所有Job我一樣會影股東相作record，試問我點解要為了一無品的小四去改變我的專業？……以前以為你是一個好女仔，原來只是一個妄自尊大、厚顏無恥喜歡含血噴人的人！……即使你是否真的會係他老婆，你不懂大方得體、繼續搞事、再係咁惡毒亂緊罵人，一樣全公司的人無人睇得起你同當你無到！……你個男人有頭有面？要經的風風浪浪多到你唔信！你知唔知我們公司打緊仗？賣緊什麼去集資？公司股東的名聲最重要，你肆意破壞！就因為一張相！就算小女人都要用吓個腦啦！唔好害你嗰個啦！有情緒病就真係去睇醫生啦！」
Rachel似乎忍氣吞聲咗好耐，不斷發炮：「以後我的工作活動，你都唔好出現囉！如果要出現，就唔該唔好發癲！我其實唔介意你存唔存在的，因為自從你顯露你自己惡毒的本性，你在我世界只會是nothing！」、「你仲未同我同我姐姐say sorry！」
原來仲牽涉埋Rachel家姐，Rachel回應時解釋：「有次活動邀請咗我家姐演唱，我家姐唔識佢（Cass），但佢喺ig話我家姐個人偽善，好兇惡咁走近佢，我家姐都唔認得佢點會兇惡咁走近佢吖？」而Rachel多次用小四嚟形容Cass，Rachel就話：「呢啲唔講，佢自己知咩事。」
Rachel指Cass曾多次無理取鬧，有次Cass喺ig又開hashtag：「#一個我倆多次合力都開唔返嘅A/C」、「#終於驚到出手再次私侵別人A/C取消曬自己原形畢露」、「#無盡謊言的偽人」、「#神除了聽禱告亦是會終極審判人的神」指Rachel入侵佢ig帳戶。Rachel則反擊：「如果下次屋企停電，唔好屈我入侵你家電！如果你屋企停水，試吓用個腦諗吓是否洗水缸，唔好又發post亂罵人！同小女人真的好難溝通！在我眼中，你只是他其中一個女人，就算結婚都不是第一個！求婚了一星期都未結，已經係度搞風搞雨，自我澎脹，結咗婚仲得了！」鬧到咁絕，Rachel回應時仍難掩氣憤：「每日唔回應佢就老作屈我，乜都有行步路食個飯都屈，Block咗佢ig就話我入侵佢ig，點解我要發聲？佢連我屋企人都鬧，但冇名都算，但tag我真係忍唔到，已經十幾日。」
Rachel稱只係見過Cass兩次，一句嘢都冇講過，Cass見到佢時態度係點佢就唔方便講，不過Rachel強調：「我同佢絕對唔係爭風呷醋！我只係因為佢不停惡意嘅誹謗同中傷我至出聲，我完全祝福佢哋開心快樂、幸福美滿、連生貴子，你而家問我都係咁講！我冇爭風呷醋！但會保留告佢誹謗嘅權利！」佢話黃生已經代Cass向佢道歉，Rachel亦想息事寧人，暫且停戰。至於Rachel現時嘅感情狀況，佢就話：「我嘅工作排到2020，冇時間！」