【周街訪．有片】婚禮人情有公價 十優麥明詩出手係咪闊綽啲？
去六星級酒店婚宴，人情起碼2000蚊？
今個月收到4封「紅色炸彈」，睇嚟要餐餐帶飯啦﹗
雙春兼潤月，即年頭和年尾有兩個「立春」，被指特別適合嫁娶，「紅色炸彈」接踵而來。每次收到喜帖都會滿心歡喜戥好友高興，但同時亦為封人情而煩惱。唔止係你同我，呢個煩惱藝人們一樣有，呢次訪問網羅明星同素人，睇下大家覺得宜家到底「人情何價」？
剛投身社會嘅港姐冠軍Crystal馮盈盈，宜家先得23歲，身邊朋友成家立室請飲經驗唔算多，Crystal話都係今年先開始收到喜帖，仲要係男友嘅朋友，攪到佢都急急忙忙上網Check下現在人情公價係幾多，得出嘅結論係酒樓八百，酒店千二，好朋友千四五左右，佢都不禁話：「咁啱旺季一個月去一單，計落其實都真係幾貴，仲要唔係我嘅朋友，不過話係我男友好朋友，都會去祝福下。」
另一位港姐冠軍麥明詩就話會跟場地級數俾人情：「頂級嘅酒店大約千五到千八，普通酒店千二，酒樓就大約一千。」 去下一單去下又一單，收多幾張帖其實使費都幾大噃：「當然唔算好平，不過調轉諗，其實都係幫自己婚禮埋緊單啫，好似分期付款咁，宜家俾完到時自己結婚人地咪俾番我囉﹗」咦，又好似幾有道理。
經常擔任婚禮司儀嘅Bob林盛斌，話晒入行多年又係老闆級，人情幾乎都係二千蚊起跳，五千甚至一萬都試過，擔任婚宴MC多年，佢好肯定講一句：「即場拆人情喺現實生活中係唔會發生㗎﹗自己從未見過，係詹瑞文拍戲先有啫﹗」至於麥美恩就話：「四位數啦﹗(範圍好闊喎﹗)咁又真係有朋友收過我一千蚊人情呀嗎﹗(識唔識㗎？姓咩？)Em……識㗎，哎呀唔好講啦佢應該唔記得㗎啦﹗哈哈哈﹗」
如果收到帖最終又無去，傳統上都會托朋友放低份「心意」，Bob就話少少地都俾一千，不過馮盈盈聽完停左一秒，再O咀表示：「吓，乜要咁㗎，我唔知呀﹗」喺加拿大土生土長嘅Mayanne都話唔知要俾：「鬼妹無呢啲嘢噃，哈哈哈，都有三個Best Friends今年結婚，三個我都無俾人情，哈哈哈，唔會俾人鬧㗎可。」所謂不知者不罪，唔會有人怪你地嘅。
藝人都參考網上「人情公價」，市民又如何呢？街訪中大部分市民俾人情都係俾800至1000，主要睇場地及交情。當中剛好有位台灣美眉，原來當地人情預算大約$1200，不過係新台幣﹗同香港也差太遠了吧，美眉聽到香港嘅人情公價都不禁話：「(台灣腔)好貴哦﹗」
香港宜家有各式各樣婚宴場地，想細攪同朋友開派對，有網友提議到麥當勞開派對，睇番官網的確有婚禮套餐，最平$2999有交易﹗市民聽到去麥當勞參加婚禮都覺得好有趣，不過人情方面都會略為調整下，呢位先生話諗住俾30蚊，唔知係入紙幣定買禮卷呢？
不過30蚊都未係極致，早前外國有一對情侶，白撞闖入陌生人婚宴，留低一蚊人情，當時對新人就話好驚喜仲想約佢地食餐飯做朋友，如果呢件事發生喺香港，好在嘅遇著黃先生何小姐，佢地話：「有一蚊都好過一蚊都無呀，將來對方結婚一蚊兌換做兩個五毫，祝佢地成雙成對。」如果遇上吳先生麥小姐就無咁好彩啦：「白撞緊係趕佢出去啦，兄弟拎報紙﹗」奉勸大家，呢啲玩笑真係唔好隨便開啦