【專訪。賤民20】張敬仁搣甩港姐尊貴　Viu劇斷背戀大解放

ViuTV自家製劇集接著上，繼靈異《詭探》、愛情小品《瑪嘉烈與大衛系列─前度》後，28號首播嘅《賤民20》，玩Cult玩黑色幽默，男主角有「男神」王宗堯同李佳芯男友陳炳銓，女子組則有前港姐吳海昕（Sofiee）同張敬仁（Kendy），二女在劇中大玩斷背同性戀，提到當中一場咀戲，Kendy忍唔住話有心跳感覺。

其實除咗同吳海昕有親熱戲之外，Kendy話有一場係講述王宗堯幻想佢著住看護制服彎身執嘢，就係呢個動作進行的同時，Kendy會無意間露出內褲……雖然成件事都好有畫面，但對於第一次拍劇嘅Kendy來說，真係難過登天。「幸好拍攝時浣儀姐在場，整個人都定啲。」Kendy於劇中飾演吳浣儀在老人院的看護，跟這位前輩有不少對手戲，她回想起開工第一日，連走位都唔多識，幸好得浣儀姐細心教路。

Kendy說自己表面是看護，但一收工就會「老嘢」前「老嘢」的稱呼老人家，加上同性戀的身份，完全切合《賤民20》的那種黑色幽默。「因為Danny（陳炳銓）之前做舞台劇，所以他很擅長將人性黑暗一面，用一個荒誕模式帶出，但自己都會擔心觀眾能否接受，因為像Sofiee的角色，既濫交又酗酒，感覺電影化多一點。」

試過被女性追求

提到與Sofiee的親密戲，Kendy笑言可能大家都是港姐出身，加上選擇唔續約，往外一試，所以產生了一定的默契。「正式拍攝時，前後take了6次，其實好舒服喎，一roll機就嚟，我靠近她時有心跳的感覺，真係有！因為當你好投入時，自然會有感覺，所以一啲都唔尷尬。」Kendy認為之所以唔尷尬，或許是因為曾就讀女校關係，也有過同性追求者，而她當時只視對方的好為友情，沒有加以拒絕，但也沒有任何的進展。

唔做大台主持

首次拍劇已經咁激，問她可會擔心無得返轉頭，她說自己只去考慮劇情或角色是否有需要。「自己想試多一點不同的角色，之前拍微電影時，是個思覺失調，今次做女同性戀者，同樣都好有發揮。」Kendy希望藉這次可以打開戲劇之路，因為不想再等完又等，回想之前在美國的銀行打工時，有不錯薪酬，但偏偏選擇了參加港姐。「選完之後，戶口零咗幾年，要幫小朋友補習，因為你追夢同時都要令自己生存到，對屋企人也有責任。」明明有TVB呢個大家庭，又為何選擇離開呢？Kendy說當初舊公司也有提議她往主持一方發展，但自己對電影、舞台劇更感興趣，經過一番考慮後，最終做出了決定。不過，Kendy也說離開了大台之後，也花了兩三年才找到能夠幫助自己事業發展的公司，所以希望藉《賤民20》好好發揮並打開新路數，不想再浪費時間去等。

場地提供：Homemade Party