Bob陪入產房看兒子出世激動到喊：老婆真係好辛苦好偉大

恭喜晒！藝人林盛斌（Bob）宣布自己第四度做爸爸喇！他還在Facebook放上了囝囝剛出世的模樣。《香港01》致電阿Bob道賀時，他透露BB有差不多7磅重，母子平安。不過因為囝囝都算重磅，所以媽咪Pearl分娩時都有點辛苦，阿Bob說：「真係好感恩，我有入產房睇住個過程，媽咪好辛苦、好偉大，我自己都好激動同感動，流晒眼淚。」

對於有報道指他終於追到囝，老婆肚皮可以收工，阿Bob指其實不存在這件事，他說：「其實無話追仔成功老婆收工呢樣嘢，我哋一直都係隨遇而安，抱住平常心去面對。一開始生咗兩個嗰陣我哋都諗住夠，不過又會諗吓我哋經濟能力係咪許可我哋繼續有小朋友，加上天意喇。其實囝同囡對我都係一樣，我都係會咁錫佢哋，唔存在追囝呢樣嘢，都係睇上天安排。（而家經濟許可到？）其實都要做好多job㗎，所以唯有繼續努力工作去經營呢個大家庭。三個囡囡都好開心，而家都想快啲接細佬返屋企等佢哋一齊玩。」在致電阿Bob的時間，他正趕去醫院探望老婆和囝囝，他表示始終囝囝比較重磅，生出來時會吃力一點，所以恢復時間會較長，他還衷心感激各位朋友和網友的祝賀及問候。其實無論是仔還是女，相信阿Bob都一定會對他們一樣的愛鍚，看他為了家庭日做夜日就知道這個家在他的心目中是多麼重的份量。