【《捍衛者聯盟》劇評】四大英雄劇情考記性 溫馨提示翻睇夜魔俠
MARVEL迷近排最期待劇集《Defenders》(捍衛者聯盟)已經有得睇，呢部集結4大英雄Daredevil（夜魔俠）、Jessica Jones、Luke Cage同埋Iron Fist（鐵拳俠）嘅美劇究竟有冇令人失望呢？
如果你冇睇過以上4個英雄各自嘅劇集嘅話，建議你煲一煲《Daredevil》首兩季同埋《Iron Fist》先，因為《Defenders》嘅主軸事件係同《Iron Fist》有關。
《Defenders》首集所有主角都已出場，但因為要交代各自嘅延續故事而4人又未碰面，劇情就顯得有點一嚿嚿，有啲鬆散。而且伏線太多，睇過晒所有series嘅觀眾都要啲時間load一load，例如鐵拳俠一開頭追捕緊嘅係乜嘢人？Daredevil同女朋友嘅關係之前係點？Luke Cage點解喺監獄？jessica Jones懷疑已死嘅大敵人翻生等等，喺第一集一次過搬晒出嚟真係少啲記憶力都唔掂！
幫《捍衛者聯盟》拍宣傳片的黃秋生就唔見，但係大奸角薛歌妮韋花就已現身，佢飾演嘅「The Hand」（手和會）首領係首次出現，一定要講嘅係薛歌妮韋花非常壓場，每句對白都有攝人魅力，一定要留意！另外動作場面係令人睇之前最擔心嘅，事關睇過《Iron Fist》嘅朋友都知道，拳拳無力、畫面一閃過就瞓低晒嘅所謂打鬥係幾咁難頂，比起《Daredevil》差幾皮，而《Defenders》就比《Iron Fist》好，武打設計介乎兩套劇之間，希望夜魔俠快啲着番套緊身衣表演下啦！
而過往4套劇集嘅氛圍都好唔同，《Daredevil》、《Jessica Jones》比較深沉，《Luke Cage》正氣，《Iron Fist》較輕鬆，《Defenders》要喺中間取得平衡係比較困難，筆者就覺得偏向深沉與正氣之間，相信隨住劇情發展會更加深沉。
暫時嚟講《Defenders》首集劇情較為平淡唔算好精彩，只係完場前一場突如其來嘅大地震似乎喚醒咗幾位主角嘅危機感，意識到大事即將發生，同時提醒咗觀眾追下一集，作為觀眾當然好期待4個主角集結啦，同埋打大波士薛歌妮韋花有幾勁啦！仍然好值得期待嘅！