【安樂蝸】為業主設計3房單位似劏房　林穎彤：客廳用來連繫家人

土地問題？住劏房？私人空間？望住一大堆解決不到的問題，後生仔女有幾灰可想而知。上不到車慘，上到車大半世供樓更慘，但無綫的《安樂蝸》就每星期介紹新盤靚樓，就算是舊樓都有靚裝修，觀眾心態是無錢買睇下都好，但剛播完的一集，卻有一個令網民譁然的奇盤，650呎的單位竟然冇廳，究竟是什麼玩法？

《安樂蝸》的其中一個環節「圖出蝸居」，該部分由林穎彤及譚永浩主持，每集都會介紹不同單位，由室內設計師幫單位改頭換面，而該集介紹的單位是位於界限街的舊樓，實用面積650平方呎，兩房一廳的鑽石型單位，而兩位主持還展示出圖則，擺放傢俬確實有難度，據設計師阿文透露業主還要求有3間房，希望有更多獨立生活空間，最後經過重新設計裝修後，確是有3間房兼且每房都有獨立的廚廁，但是個客廳呢？冇錯，客廳已經被消失，而林穎彤和譚永浩卻表現得甚為雀躍，還一邊拋圖則表示問題已經解決。

該集節目播出後，有追看開《安樂蝸》的觀眾，就話業主擺明想將單位改裝成劏房租出去，而電視台不但鼓吹劏房文化，還要讚個設計師叻叻豬。另外，根據單位的圖則顯示，廚房的面積還要大過睡房，隨即有網民揶揄「業主梗係諗住租客每日花費喺廚房嘅時間多過喺房」。若然真的是一家人住，回家後即時各自返入房，私人空間程度誇張到連見面機會都冇，想真點確是可悲。

林穎彤接受《香港01》訪問，原來當時的興奮表情全是節目效果，問到她想有私人空間還是客廳，她表示「我覺得廳都好緊要，接受唔到冇咗個廳，可以同屋企人睇下電視，當然都想有獨立嘅房啦，但俾我會選擇先保留個廳囉，同屋企人都要有共用嘅空間，如果一入房都係希望用嚟瞓覺或者休息，一返到屋企未沖涼落妝，都要喺個廳度靜一靜，坐陣先做其他嘢，對我嚟講都好緊要，唔想一入屋就上床。依家習慣咗同媽咪一人一間房，同埋都有個廳嘅，傾偈時喺廳，做自己嘢先喺房囉。」

林穎彤表示自己絕對不會咁間房，無論如何也要保留客廳，對於網民懷疑業主如此裝修，目的是當劏房出租，「我冇去嗰間屋，（我的部份）喺公司裏面拍嘅，至於係咪用嚟出租？我始終冇去到，都唔係太清楚。」

為該單位設計圖則的設計師阿文表示，他也是第一次接到這種改動，「我都係交咗個設計俾佢，之後就冇follow任何嘢，都唔知佢係咪當劏房喎，甚至唔知佢有冇實質起出嚟。（如果這樣改動要幾多錢裝修費？）我都冇去現場睇，呢樣都答你唔到。」無綫由介紹豪宅的地產節目，到現在教業主如何改裝單位變成劏房，真係非常貼地，只係住緊劏房的朋友心裏不知是何滋味。