【早霸王】人夫戀上已婚婦電台自白　森美：愛係冇錯！不過關係錯

小儀放假，今朝嘅《早霸王》仍然有森美同西瓜留守，接聽咗自稱「超人」嘅聽眾來電，「超人」表示同意中人相識咗好多年，分開咗廿年之後喺一次聚會入面撞番，而大家都已經結咗婚，但喺曖曖昧昧嘅情況下喺埋咗一齊，森美聽到呢句即刻倒抽咗一口涼氣，「超人」繼續講：「但一直喺呢段時間入面所發生好多嘢都令到佢喺情緒崩潰，我改變咗佢一生。」森美就問佢：「嗰陣時大家都結咗婚？」聽眾答：「係。」

森美嘗試分析：「咁梗係大改變啦！可能佢由始至終對愛情都好單純嘅！結咗婚就唔分開㗎喇，遇到你就梗係好大嘅衝擊啦！咁兩個都婚外情喎呢啲真係。」森美又好同情咁話：「愛係冇錯嘅！不過係關係錯啫，令你哋辛苦，冇得返轉頭，但可以改變嘅，亦有人選擇離婚，離婚唔係完全唔可以接受嘅事，不過犧牲好大，每個人改變會多好多，你兩個係咪都決定唔離開另一半呢？」聽眾「超人」就答：「其實我已經離咗婚，但我唔想佢離婚。」原來「超人」已決定離開香港，等女方冷靜下，森美聽完鬆咗一口氣，就話估唔到佢係打嚟同對方講分手。

不過森美今次嘅處理方法同以往唔同，為避免女方身份曝光並冇直接打畀對方，而係由西瓜喺咪後打畀佢睇下對方願唔願意on air出街先，結果對方唔願意開聲，西瓜轉達：「原來一直有聽緊收音機，（西瓜模仿對方哽咽）佢ok呀！唔接上嚟喇！」森美亦好尊重女方，畀「超人」講埋兩句心聲之後就總結話：「我依然堅持愛情係冇罪嘅，係點樣相處啫！愛一個人永遠永遠愛佢，冇夫妻或情人關係可以永世相愛嘅！唔需要覺得唔開心！愛得及時好重要。」然後提番上次Lucy嘅故事：「咁多錯愛嘅故事嘅！時間係愛情嘅最大敵人呀！」節目完結後我哋聯絡過森美，可惜佢未有回覆。