謝安琪繁忙時間坐港鐵 張繼聰ff《初戀無限touch》：下次我join
撰文：何志衡
出版：更新：
謝安琪(Kay)間中都會搭下公共交通工具，細女張靖出世之後可能搭少咗，不過昨日Kay因為要去大仔張瞻學校參加家教活動，之後一個人就去咗搭港鐵返屋企，仲自拍po相添！跟住佢老公張繼聰分享兼留言喎：「下次我join，再搭埋巴士叮叮渡輪咁就初戀無限touch啦」，閃盲我哋喇大佬！
謝安琪使用扶手電梯都不忘自拍。
Kay昨日素顏兼戴住米色帽搭港鐵，由馬鞍山線轉到東鐵線上水方向，沿途一直自拍，並留言話：「恰巧遇着下班時間淘湧的人潮，我就在人潮中暢泳，PS最後在車站喝了杯脫咖啡因咖啡」。不過睇佢幾張自拍照又唔算太多人，林一峰都留意到，留言分享：「馬鞍山綫好舒服」Kay就話：「馬鞍山綫有位，之後羅湖綫就……」
Kay喺回應時話有人認得佢，而且靜靜雞要求佢合照，令佢覺得受到尊重同保護，係一次寶貴經驗咁話。
雖則Kay喺港鐵開心自拍，但昨日雙學三子黃之鋒、羅冠聰及周永康被判入獄，有網友就問一向關心政治又支持過學運嘅Kay：「還記得＂撐起雨傘＂嗎？今天天氣好、心裡好？」遇着咁突如其來嘅問題，Kay回應得好有體面：「謝謝你的留言，我們這一代要面對的，的確很多。忙裡要偷閑，苦中也作樂，希望你也找到喘息的空間。」
老公張繼聰就喺自己fb分享咗Kay嘅帖子然後寫道：「咁寫意？下次我join，再搭巴士叮叮渡輪咁就初戀無限touch啦」，《初戀無限touch》係97回歸年上映嘅電影，講陳曉東喺地鐵遇見梁詠琪，一見鍾情然後墮入愛河。張繼聰真係識冧老婆，但係會唔會閃得滯呀！
Kay仲話估唔到搭馬鞍山線會有位坐，但去到往上水方向就好多人。
網友問kay記唔記得「撐起雨傘」，Kay回應苦中作樂，希望找到喘息空間。
張繼聰呢句真係太sweet！