37歲司徒瑞祈開舖賣小食 離巢重新開始：好想踏出呢一步
人稱阿水嘅司徒瑞祈2012年由演員轉型做兒童節目主持，雖然今年4月佢就同無綫講再見，休息幾個月後，即係今日（16日）他正式榮陞做老闆，係慈雲山開小食店「阿水廚房」。見佢係舖頭親力親為，37歲的司徒瑞祈都好有感觸咁話，「成唔成功未知，最緊要開心。人生好短，賺幾多錢都無用，做人簡單啲就會開心同幸福。」
2004年以青春愛情劇《赤沙印記＠四葉草2》出道嘅司徒瑞祈，2012年就被TVB調到兒童節目做主持，而家回憶起當時嘅情景都好享受，仲話唔覺辛苦，「其實TVB嘅辛苦反而係一開始拍劇要日夜顛倒，做兒童節目就無辛苦嘢，辛苦咪記稿，但做耐咗成班人都好開心，反而日夜顛倒對我真係辛苦。」阿水笑言因為自己生活好規律，「我好早就瞓，所以早睡早起對我無難度，現在日日都係咁。（有無唔捨得？）唔捨得只不過係解散咗兒童組。」咁有無諗過如果續約TVB會有咩新發展？阿水就表示自己都有考慮呢個問題，「可能都係做青年人節目，我會諗再老多幾年，可能做《都市閒情》，但又覺得公司未必會咁樣幫你安排。」他指自從無得做兒童節目之後就當係一份工咁打，「但我好想踏出呢一步，真係想實現夢想開阿水廚房， 所以續約嘅時候令到自己向前睇，睇下自己夢想係咩，如果繼續簽落去，唔知幾時先會跨出嚟。」
阿水指選擇不繼續與TVB簽約要用好大勇氣，「去年7月我知道公司好快搵我傾約，我同自己講今年一定唔簽。其實兩年前都有想講話唔簽，但最後被動搖都係簽返。但今年就同自己講，唔簽唔簽唔簽，一定要自己創業創夢，當時身邊好多朋友都叫我記得唔好返去。」咁其實以前係TVB嘅人工係咪太低先選擇不續約？他就表示人工一向唔差,「只不過我覺得係繼續做落去，做唔到自己想做嘅嘢，同埋最開心嘅時間都過了，咁我不如自己搵一啲更加開心嘅嘢，因為我覺得工作最重要開心。」
阿水最後都重申自己無離開到電視圈，「有啱嘅咪做，最近都有為ViuTV拍節目，自己都鍾意吹水，有機會咪做主持人，唔係完全脫離演藝圈。」佢仲話自己嘅座右銘就係簡單就會快樂，快樂就會幸福，希望大家都搵到自己嘅夢想！