【踩過界】嗚呀！女神疑似封盤 朱千雪鍾意居家男：最緊要有交帶
《踩過界》第二季昨晚已經出街，大家引頸以待的千雪BB（朱千雪）終於千呼萬喚始出來。有心急的觀眾可能晨早上了愛奇藝，為見BB一面無視國語配音，但女神總是百看不厭，未來個多月的週末都有理由留在家中睇電視了。不過，近來多次傳讓一眾男Fans心碎的消息，就是千雪BB疑似封盤，與澳州讀醫男Justin Ng過往甚密，雖然千雪的回應都是「了解中」，但眼見朝思暮想的女神快被佔據，自然想知Justin Ng何以有如此大魔力讓女神都要親自「了解」呢？
早前我們就與千雪BB做過訪問，跟她玩數條愛情心理測驗，揭曉答案時，千雪BB不禁點頭說準。或者在「神準的心理測驗」中能看出一點端倪，知道千雪BB容易受什麼類型的男士吸引，各位男Fans稍微改變自己一下，嘗試追求千雪，說不定能夠「逆轉勝」。不過，無限FF都冇問題，任君選擇。
（紅字為千雪BB所選答案）
1）最鍾意咩天氣？
A）晴天
B）陰天
C）雨天
D）颱風
結果：朱千雪難唔難追？易追指數有40％，你的為人隨性，喜歡自由生活，最好一切順其自然。在戀愛方面，不會太強求愛情的來臨，要發生自然會發生。所以隨和的性格導致導致你較容易追到手，追求者只要投其所好，多數由朋友開始發展，持續地、不斷地關心你，相信好快就會追到你。
千雪BB話：
由朋友開始，都好中喎…順其自然吖嘛可以！仲有句都好啱，就係長期關心我，因為拍拖最想都係有人錫我，其他嘅嘢我自己會handle到嘅，有冇人錫、關心你，就真係要靠另外一半。同埋由朋友開始發展係最好，起碼係熟悉嗰個人，同埋我好怕尷尬，如果一嚟就講啲咁認真嘅話題，咁我就係覺得你係鍾意我個人，定係你純粹想搵個女朋友。同埋可以理解我嘅工作，其實佢唔需要真係知道，但佢要明白我嘅感受，未必要知道我做訪問係乜，又唔洗明我拍劇畀人鬧，但至少明白我嘅唔開心，去做返一啲事氹返我。
2）如果要做配音員，你會揀配…
A）生病的公公婆婆
B）爆粗古惑仔
C）笑喊BB
D）天真少女
E）火車電單車聲
結果：朱千雪最頂唔順男朋友…最接受唔到另一半講大話，本身都冇咩安全感，所以內心都好想搵一個好似家人咁嘅伴侶。所以如果有講大話嘅行為，對佢嘅信任都會玩完，就會同佢講分手。
千雪BB話：
其實每一個女仔都會嘅，就算係其他答案都係喇，有邊個會鍾意對方會出軌先？不過要成功講到一個大話係好難，除非你叻到可以講到一個大話係呃到我一世。其實好易呃到我，因為我對人都好信任，但如果講大話講得好差，係人都知你係講大話，咁就麻煩啲，我都好難去信你。不過到而家都未遇過，或者佢哋好叻喇！
3）如果抽獎中咗架車，你會揀…
A）黃色的旅行車
B）白色的箱型車
C）紅色跑車
D）藍色轎車
結果：朱千雪鍾意居家型！能夠給你安全感，是最需要，而且最好不過的！不過要小心呀！這種過於安穩的相處模式，都會好似空氣一樣，慢慢就會感受不到他的存在，卻又少不了他。
千雪BB話：
其實都幾中，我都幾需要安全感嘅人嚟，因為我有時比較容易諗得多咗，會諗：「咦？點解搵唔到你嘅？」、「點解一定要同佢食飯嘅？」唔係麻煩嘅，我都尊重對方係有大家嘅生活嘅，但覺得我都有責任話畀對方知，呢一刻做緊咩，因為我冇嘢要去收埋，所以我都希望對方唔好令到我去擔心。你有嘢做係OK嘅，但就唔好半夜三更搵唔到你，我就會驚會唔會出咗啲咩事呀。（對方需唔需要秒回你？）咁又唔需要，但我最怕就係睇咗唔覆，呢一樣真係會令人好嬲，不論朋友定咩都好，如果係咁我都會諗點解唔覆呢？有交帶，我唔係要Check住你，只係覺得唔好令到我擔心喇。同埋我唔介意悶，我鍾意穩陣嘅感覺，老夫老妻？冇所謂喇，如果你係同得呢個人一世，都會有呢一日喇，同埋拍過劇，幾轟烈都試過晒，現實唔駛咁戲劇化。
總結：「都幾準！」
朱千雪做心理測驗時，有好幾次都話準。剛巧當時她有位對象，表示了解中。不過玩埋心理測驗得到答案後，她笑言對方都符合答案或心中所想的條件，似乎呢位男士屬於暖男系，成熟穩重、理解千雪BB的感受，莫講話女神，一般女士都好Buy這類型的男生，所以女神假如有日真係封盤，其實都不足為奇。