【九寨溝地震】吳亦凡低調豪捐70萬振災　網民扭曲事實指他捐30元

四川九寨溝發生7.0規模地震，災情慘重，不少名人紅星響應捐款，就好似新戲《戰狼2》大收的吳京，災後第二日，已低調捐出100萬人民幣，但卻被網民指「不捐個億就不愛國」，而呢種「道德綁架」，原來亦都發生在吳亦凡身上……

地震發生後，吳亦凡於微博轉發人民日報新聞，並寫上「愿平安」，但原來佢同時亦分別透過「中國社會福利基金會」以及「壹基金」以支付寶形式，各捐出50萬及20萬人民幣，而只要係微博平台捐款的話，都會自動產生訊息，藉此證明收到捐款金額。

但對捐款一事，吳亦凡似乎想低調，所以火速刪除了兩條捐款提示，結果就被網友指佢「捐得咁少，當然要刪」，網友所謂「少」，其實係因為吳亦凡刪除的訊息當中，有一條顯示金額為30元，係囉，點解會咁呢？有網友馬上就指出無論捐款多少，條訊息都只會顯示30元……咁兒戲？難怪引來誤會。但無論點，吳亦凡捐出70萬，比起劉亦菲所捐50萬、楊幂劉愷威夫婦60萬、黃曉明50萬等還要多。