【Big Big Channel】鄧萃雯黎耀祥直播互窒爆笑　隨時有機演父女

鄧萃雯與黎耀祥這對最佳拍檔昨晚齊為「Big Big Channel」做直播，經典組合再現，唔少網民都十分雀躍。直播一開始，大家問得最多嘅都係「雯女幾時再拍劇」，她表示正在等陳寶華（陳的作品有《再見亦是老婆》、《十月初五的月光》、《真情》、《妙手仁心Ⅱ》等，早年轉戰內地至近年回巢TVB。）的完整劇本才再考慮，在旁的祥仔聽罷馬上笑雯女咁揀擇，「咁你點生活呀？」沒想到雯女轉數十分快，並謂「慳啲使，唔買法拉利」，似乎在笑祥仔愛兒早前晒靚買車貴表一事。

二人搞笑對答一輪後，雯女轉入認真mode，解釋開頭一番說話，指有完整劇本的話，可讓一眾演員圍讀，令效果出來更好，不過祥仔就認為拍劇講靈感，預先傾好會少了驚喜，聽落又似乎幾有道理咁，果然係視帝。

期後當網民聽到雯女表示十分歡迎同祥仔再次合作時，即問二人想做夫妻、兄妹、父女還是仇人，雯女聽到「父女」二字時忍不住大笑，並向著皺晒眉頭的祥仔謂：「睇佢囉，如果佢都係咁殘，就要做父女喇。或者忘年戀，冇辦法，因為依家要講顏值。」說畢又不忘「補飛」謂：「佢其實有時可以好有顏值，例如同我一齊做活動，佢係特別靚仔啲架。」

祥仔即接話笑指自己是「睇場合嘅人」。之後，網民再提議二人開演唱會，雯女聞言即拉祥仔落水：「你跳舞呀，我唱歌。」祥仔亦不甘示弱反擊：「你夠膽唱，我夠膽跳。」雯女聞言再次大笑，並追問祥仔：「我無論唱咩，你都跳到係咪？」祥仔即示：「我即刻為你排隻舞都得。」如果二人真的兌現承諾，相信欣賞指數一定爆燈，希望有直播啦。