雷深如（J.Arie）今日（13/2）現身葵興音樂室為2月15日演唱會《J.Atriarchy》綵排。雷深如出道11年，將以這個演唱會作最後終站，暫別歌手身份，而有如此決心，並非衝動，她表示：「其實我個人覺得，嗰樣嘢總會有終點，如果話俾自己聽係最後一次，就必須一定要全程投入，明白到唔會再有下次，變咗我係會俾晒我嘅所有，反而對我嚟講係一件好事。（有冇諗過歌迷會好唔捨得你？）我相信樂迷們係會唔捨得，但我會同佢哋講，可以喺唔同嘅途徑都可能會見到我嘅，唔淨係只係出嚟派歌就派歌咁。可能日後可以喺舞台劇見到我呢，又或者我會做演員，同埋有幸見到我喺人哋隻歌度會見到我參與呢。」

被問到是否歌手路難行，過程導致身心疲累，先作出這個重大決定？雷深如表示：「畢竟做咗獨立自資歌手已經有五年時間，係辛苦嘅，同埋每出一首新歌嘅時候，都要好精，唔會亂咁去出。就好似我嗰隻新嘅大碟，裡面有十首嘅新歌，就係我呢35年想講嘅嘢，都寫晒出嚟。」