【仲講龍哥?】蘇民峰出山Rap新歌 重奪玄學家Rapper一哥地位

撰文:何志衡
出版:更新:
龍哥獨有嘅freestyle超度方式令佢迅速成名,坊間有人惡搞成Rap歌版本,不過龍哥好快就out咗,連《BigBoys歷險記》都cut曬佢啲「戲」呀陰功!不過講起玄學界Rapper,都好難取代到大家心目中的蘇師傅蘇民峰,而咁啱蘇師傅最近都Rap咗新歌喎!

其實10年前蘇民峰已經為有線嘅《峰生水起精讀班》唱過主題曲,當年都系Rap㗎!仲早過麥玲玲同農夫首《風山水起》。今年奇妙電視新節目《中伏》亦由蘇師傅主持兼唱埋主題曲,蘇師傅喺佢專頁都有放少少錄歌時嘅花絮,冇唱10年師傅好似有啲緊張,開頭跟唔到音樂,但系監製提咗句佢就即刻跟到喇!可惜片段太細聲聽唔清楚師傅唱乜,但都聽得出佢系Rap緊歌。
雖然有蘇師傅坐鎮,但原來個節目系同玄學無關,點解呢?據聞又系被TVB嘅潛規則所限,事緣蘇民峰喺「Big Big Channel」有個玄學頻道,會開live講2018年生肖運程,於是乎就唔可以喺其他電視台做玄學節目嘞。
咁《中伏》系咩節目呢?奇妙電視回覆:「系一個講法律漏洞嘅節目,例如你做咗啲行為可能犯咗法都唔知,咁就中伏。」而蘇民峰系主持之一,每集會請一啲律師、名人等做嘉賓,而蘇民峰首歌好快就有得聽喎。