【網絡紅人】達哥打機叻跳舞仲叻　自稱勁過MJ：以前玩過跳舞機

一連三日的香港電競音樂節終於完結，依幾日除咗有SMTown的表演與英雄聯盟(LOL)前世界冠軍隊的表演賽，當然唔少得一班香港網絡紅人的「紅白對抗賽」，達哥仲同譚杏藍 (Hana Tam)一齊玩「Just Dance 2017」，殊不知達哥唔聲唔聲，竟然舞王上身，跟足首歌跳足全程，跳得似模似樣，真係叻叻豬。

話說電競音樂節一連3日都在Festival Zone舉行「網絡紅人紅白對抗賽」，單位邀請到達哥、大J及譚杏藍等本地知名網絡紅人對戰，遊戲包括《FIFA 2017》、《Just Dance 2017》，亦有懷舊遊戲《Super Mario Bros.》、《Street Fighter II》與《Tertis》，而達哥就同Hana一齊玩「Just Dance 2017」。

要知道《Just Dance 2017》為一隻舞蹈遊戲，假如平時沒有練習，操作的時候絕對會力不從心，大出洋相，而且達哥和Hana二人所選的跳舞是「Major Lazer & DJ Snake - Lean On」，節奏開頭十幾秒之後已經好快，進入副歌時更是萬分緊湊，但達哥竟然毫不怯場，一邊同主持吹水，一邊繼續跳，跳得有板有眼，仲拎到5371分，唔通達哥平時除咗打機之外，仲有同兄弟跳下舞？達哥接受《香港01》訪問，「今次係第一次玩《Just Dance 2017》，自己以前玩過跳舞機。」原來係咁！唔怪得咁有功架。至於第日會唔會開台果陣玩呢？佢就話：「自己依家未有Switch，睇下有冇時間喇！」

一齊睇下達哥精湛的舞技！！！

跳完舞之後，達哥就換遊戲玩咗幾鋪八分音符，遊戲要求玩家利用抑揚頓挫的聲音控制「八分音符醬」跳過不同障礙過關。而玩家發出的音階越高，音符醬亦會隨之跳得更高，達哥當然唱返自己的主題曲「真.爆機兄弟」去操作，當大家聽到「九點半就要睇～～直播！」、「九點半就要睇～～達哥！」真係笑到收唔到聲。