【任噏影評‧星際特工】大愛累事變爛尾　Rihanna吳亦凡高低之分

《星際特工：千星之城》作為一套宇宙科幻電影，仲要用成兩億美金去拍攝，啲人話特技靚到嘩嘩聲，睇落又真係唔錯嘅。作為一套科幻電影特技當然重要，尤其係一開戲就出場嘅珍珠族的雷爾星，整到成個世外桃園咁嘅款，而當個星球被毀滅嘅時候，嗰陣世界末日嘅感覺做得好迫真、好震撼，呢一種相信都係出名拍科幻戲嘅洛比桑導演功力。

除咗景靚，故事入面有一場戲在市場捉複製獸，雖然話套戲係改篇自漫畫，不過要將呢部份嘅劇情拍出嚟都真係一啲都唔易。一個本來乜都無嘅沙漠，原來戴一個裝置就可以變成一個喧鬧的市鎮，感覺就好似戴咗VR眼鏡咁。當然宇宙上面嘅飛船畫面都做好得美倫美奐，尤其是嗰座喺宇宙集合多個外星族的阿爾法城市，每一個位都做得好細緻，有一種魔界獸人地下城嘅高科技版。講畫面，緊係要講埋女主角Cara Delevingne坐潛水艇落深海捉水母嗰一幕，嗰幾隻海獸大得嚟唔假，移動得嚟又夠震撼，如果出多幾幕呢啲大型星種相信觀眾們會更加過癮。

喺畫面上基本上都真係贏晒，尤其除咗畫面，女主角Cara Delevingne實在比畫面更要吸引。對上一次留意佢演出喺《自殺突擊隊》入面做女巫一角，嗰陣其實就唔太睇得清佢個樣，不過做戲就愈來愈有味道。喺呢套戲上面有少少冷酷嘅佢更加有令人捉不著的媚惑感，靚女不嬲都容易成為焦點，佢仲要得25歲咁年輕，大把世界。不過講起女角色，我就好唔明Rihanna嘅出現係為乜？佢嘅藝術成就當然係無可否認係好鬼死勁，近年開始多咗拍電影，不過對上一套對佢有印象嘅戲係仲係《超級戰艦》，飾演一個過份矯情嘅海軍軍人，嗰陣已經覺得佢唔太適合做戲。今次呢套戲其實係比較無咁難睇，如果佢出場有一半時間係跳舞，或者CG咗個樣，不過一講對白就出事，始終都仲係好生硬。不過佢都算好慘，劇情毫無交代到佢點受傷就死咗，仲要死得好快，好似隔硬要佢死製造摧淚位，不過可惜佢死咗完全唔感動，只係覺得死得好膠。其實戲中都有另一個空降明星，就係呢排因為《中國有嘻哈》而爆紅的吳亦凡，又係一個歌而優則演嘅角色。戲入面佢同Rihanna戲份差唔多，不過更加自然，而且仲搣甩咗佢平時Hip-Hop風格嗰陣囂張味。當然佢嘅成就無得同Rihanna比，不過如果只以呢套戲嚟論，我覺得吳亦凡會係高少少。

其實套戲係幾緊湊，由珍珠族個星球被毀滅，再到市場搵神獸，去到要查珍珠族案途中遇到嘅刧難，其實一直都去得好順好靚。可惜去到最尾，講到基乎被滅族嘅珍珠族終於現真身，正當我諗緊佢地會點樣報仇，會唔會係毀滅阿爾法再殲滅人類，男女主角又點樣運用機智才能去拯救人類嘅時候，原來我一切都諗多咗！珍珠族話佢哋已經好大愛咁原諒咗個罪魁禍首，仲話佢哋只係想想建立另一個星球之後走人就算。嘩大佬唔係嘛，你俾人毀滅咗個星球，仲爭啲滅咗族，連星球入面嘅神獸複製獸呢啲無限金錢制造器都只係死剩一隻，你竟然乜都無爭取過或者報仇過就話原諒？係嘅，要happy ending嘛，唔可以宣揚邪惡訊息嘛，咁以後《復仇者聯盟》都唔好打架喇，大家俾人打完咪算囉，滅族都無乜所謂喇。其實成套戲都真係幾好睇，可惜呢個位真係做得唔夠過癮，起碼都打埋場交睇吓，又或者用吓啲智謀啩？宣揚完大愛之後，套戲就係兩位主角嘅親吻中同大家講bye bye，我真係有啲失落。