《使徒行者2》預告片率先睇超震撼　卓Sir苗僑偉喊係咩原因？

三年前無綫自製的時裝警匪電視劇《使徒行者》大受歡迎，播出後收視就有升無跌，成為大家茶餘飯後話題猜測邊個先是卧底，掀起一陣煲劇熱潮。《使》劇更再次捧紅主演佘詩曼及林峯，使他們人氣再次急升，釘姐同爆Seed一角至今仍令電視友念念不忘，《使》劇無疑就是一部經典劇集。

既然收得無綫當然例牌會開拍續集喇！《使徒行者2》雖然佘詩曼及林峯不在參與當中，不過仍保留苗僑偉及許紹雄等人馬，還加入了不少演技派如宣萱、陳豪、袁偉豪等人，還有歌手周柏豪初嘗拍電視劇，未播就已經引人關注。

據知今次《使徒行者2》不是續集而是前傅，雖然主要班底已經換晒，不過仍然好吸睛。香港電視友對該部劇集期待甚高，想繼續睇卓Sir同歡喜哥的表現。事實上，除了香港電視友想睇之外，內地電視友都好期待播出「超级想看」「期待ing」「想看三哥」…等到頸都長埋添。

《使徒行者2》同內地網台同電視台有合作，將會在中國東方衛視及騰訊視頻播出。早前騰訊悉出消息表示該劇將會在7月24日播出，但翻睇又唔見喎不了了之，相信播出之日仲要等待公佈。不過就好肯定一件事就是《使徒行者2》內地會比香港率先播出。就正正因為咁搞到大家都好擔心《使徒行者2》會不會學《踩過界》一樣被獲安排在星六﹑日播，大家都紛紛話唔好。其實又係嘅，一部咁大製作故事題材又咁有猜測性的劇集，如果安排假日播又真係好浪費。不過，因為上一輯咁收得無綫對這部劇投入咁多資源，相信這個可能性極低，唔通努力咗唔求有回報咩？

既然內地方面率先播出，今日騰訊方面就率先播出預告片，給電視友沚一沚渴。從這一段1分幾鍾的預告片看出，無綫的確投入了好多資源，見到去了泰國﹑內地等地方拍攝，場面十分震撼似足電影。影片中出現不少打打殺殺場面，三哥一直為卧底的事情似有所思，周柏豪同許紹雄拿著槍互相對幹等等，大家都不知道卧底在這一刻到底是甚麼身份，是黑警﹑是自己人還是…令人睇到好緊張。最後三哥還流淚：「要不是我叫他們做卧底，結局就不會這樣。」到底是怎麼樣，未正式睇已經覺得好精彩。雖然少了佘詩曼同林峯出演，好似總係差少少咁，不過始終有三哥同歡喜哥助陣，這個絕對係想睇原因。亦因為這部係前傳，仍加入不少角色特別係周柏豪，令人更想睇睇他的演技到底有幾咁…好呀！

其實講真大家咁期待播出，仲講到要充值做會員等追睇，其實一點都不誇張。向來香港所拍的警匪片都有水準，這一部劇拍到全城都估邊個係卧底，考大家的思維，其實好有參與性。今次只係睇預告都睇得出又係玩邊個做卧底的劇情，相信唔會死。因為過去大家鬧無綫「膠劇」多多，其實所謂「膠劇」就因為接下來的劇情大家都會猜測到，而這種劇一年不多過三部，其實香港電視觀眾係聰明嘅。所以絕對睇好《使徒行者2》。