洪金寶爆當年與午馬一齊風流　錢嘉樂：我趕唔切參加

洪金寶昨晚出席《倩女幽魂》特別放映場，談到午馬遺孀馬艷感激雪中送炭，洪金寶表示與午馬工作多年，自己應該要付出少少：「我錫佢，佢又錫我，喺埋一齊時咩都講。飲酒、風流咩都做。佢可以由早飲到夜晚。」洪金寶最懷念是午馬為人，更自爆當年在尖沙咀夜店玩樂時，遭酒客不禮貌對待，午馬之後在場外等待對方，指罵對方。「佢為我出頭，但又打得，我企後面睇佢要唔要幫手。佢係咪最有義氣我唔知，但佢真係有義氣。我同佢由邵氏開始已經識，好多嘢都幫我好多。」洪金寶又大讚午馬有酒膽有酒量兼且有酒品，仲話「佢酒品同我人品一樣」。

錢嘉樂、錢小豪亦難忘午馬當年十分照顧自己，又指午馬十分溫柔，但問到有無份「風流」時，錢嘉樂即話「趕唔切參加」，又話當年比較多在尖東某酒店開會。錢小豪當年在《殭屍先生》合作，問到如今仲有無打算再拍，他指題材會受地區限制，但如果有投資者感興趣，自己都想拍《殭屍伯伯》。