張文傑回應電影院結業潮 爆同行電影人失業:大家都好苦惱

撰文:張祖銘
出版:更新:
張文傑昨日(13日)出席電影人梁子賢有份投資的「老二餐廳」開幕活動,他接受《香港01》 訪問時表示:「我冇份投資,我嚟到支持,支持好朋友做生意同飲食都比較困難,有能力就過嚟支持吓。」他透露自己有考慮過做生意,不過要找到適合的夥伴。

被問到最近的工作安排,他表示:「都係忙緊,拍完電影《臨時決鬥》,嚟緊會宣傳。」至於最近有許多香港電影院宣布停業,他說:「呢樣嘢唔係除咗電影人去堅持,喺香港人點樣去支持返自己電影作品,需要靠大家,付出幾多得到啲乜嘢都要大家去行呢條路。」談及是否很多同行的電影人沒有工開,他坦言:「其實有好多朋友大家都好苦惱,我都唔知點解決,大家都係處於呢個狀態,冇工作嘅時候都要諗點樣去生活,每個人嘅經歷睇吓點樣一齊行過呢件事。」講到是否有同行的人開口問借錢,他坦言:「咁暫時又冇喎!」