林明禎放飛機缺席首映禮　王晶句句有骨：一兩部戲得咗就好巴閉

導演王晶昨日（10/12）現身觀塘出席電影《你嫁咗俾隻鬼？》開鏡儀式。對於電影《手機見鬼》日前舉行首映禮，身為電影女主角的林明禎卻突然甩底，向外宣稱「護照唔見咗」，導演彭發受訪時非常不滿指「唔係咁簡單就算」，事後遭網民圍插「未紅先驕，擺大牌」，事件引起全城關注。

導演王晶接受《香港01》訪問時表示：「成件事我覺得佢唔重視嗰部戲，如果佢好重視部戲佢一早嚟咗啦。（你覺得佢有冇講大話？）咁我又唔知啦，因為我唔識林明禎，我同彭發又唔熟，我唔適合俾意見。（如果發生喺你身上會點處理？）冇乜所謂啦，最多下次唔搵佢拍戲，我覺得冇道德。（一套電影宣傳女主角係靈魂人物！）當然啦，就好似《破·地獄》咁，黃子華和許冠文咁大卡士都走圍去宣傳啦，咁就係睇你重唔重視嗰部戲囉。唔係話你有一兩部戲得咗，就覺得好巴閉咁樣囉。」