《中年》伍仲衡搶簽洪心怡疑遭TVB炒魷　肥媽：個女仔好犀利咩？

肥媽和黑妹今日（9/12）現身土瓜灣為「肥媽笑住唱Part ll」演唱會綵排。對於伍仲衡近日因搶簽洪心怡，辣㷫無綫被「炒魷」，遭即時踢出《中年好聲音3》停任節目評審，惹起網上熱討，肥媽亦有了解事件。

肥媽接受《香港01》訪問時表示：「其實我3日前先返嚟，一返到嚟就聽到呢件事，於是就梗係打畀身邊嘅朋友問吓，點知都問唔到嘢。到第二日，就睇到TVB嘅聲明，話唔會因一個人就有咁嘅決定。個女仔好犀利咩？但我覺得唱歌幾好，但就不至於囉。同埋我哋《中年好聲音》經常都會換評判，又或者第日嫌我畀分畀得太鬆手換我都得，我哋係冇簽合約，唔一定要做嗰個節目。不過我會問伍仲衡，大家同我定。（有人話伍仲衡冇道義！）會唔會呀，大家做呢行，佢做人唔識做呀，我覺得佢唔係咁嘅人，無理由㗎。（會唔會佢太過愛才心切？）佢真係咁犀利咩？我真係唔知呀。講真《中年好聲音》冇邊個唔得啫，冇參賽者就唔得，同埋冇TVB唔得。呢個節目最緊要係參賽者同TVB。」