愛回家｜張景淳自言聖誕好得閒　吳偉豪日日同呢位「猛男」過

《愛．回家之開心速遞》吳偉豪、張景淳、陳浚霆、樊亦敏、滕麗名 等人今晚（06/12）出席仁濟的盆菜晚宴活動。吳偉豪和張景淳接受《香港01》訪問時，吳偉豪表示曾參與過仁濟活動，他們也表示當晚需要出騷唱歌。張景淳更笑言：「好彩唔係搵我做主持，你知我講嘢好慢。」

問到聖誕節的活動，他們均表示聖誕節那段日子都是以工作為主，張景淳更「賣廣告」說：「嗰段時間我哋都係得閒嘅，其他時間都度晒，淨係聖誕好得閒！」單身漢會否約異性行街約會？吳偉豪回答：「我冇諗過，我顧住陪我細佬。因為佢去咗外國讀書，都成年幾兩年，難得今年可以留喺香港兩個月，所以我keep每日得閒都約佢打網球，一齊打壁球。返到嚟終於可以睇吓佢成長咗幾多。」

單身過聖誕會否覺得寂寞？吳偉豪也回答：「我覺得有《愛回家》呢個劇組唔覺得lonely，聖誕節大多數都係開工。」張景淳說：「我覺得公司有心思，喺聖誕前後一兩日有大圍戲，我哋都喺嗰度叫到會，慶祝埋，同台前幕後一齊慶祝，基本上每一年都係咁做。」