古天樂口快快爆《新聞女王》電影版已開拍　佘詩曼呻新劇難度極高

古天樂、佘詩曼今日到機場禁區出席大型熊貓主題展覽揭幕活動，同2,500隻熊貓雕塑打卡，大會仲準備咗《九龍城寨之圍城》龍捲風及《新聞女王》MAN姐特別版雕塑。另外亦有真人着熊貓衫出場，假熊貓與古天樂又擊掌又攬攬。

古天樂透露曾經探訪過熊貓，要着足保護裝防疫，而講到「真人熊貓」時，古天樂就話見對方件「熊貓衫」好厚，好驚會中暑，而佢仲分享之前拍《明日戰記》時，着上超焗盔甲後嘅散熱心得：「頭先件衫可以貼冰貼嘅，搽火酒都得，一着一除可能要半個鐘，可以擺多啲風扇。」但古天樂今日都着厚褸，他呻：「今朝我見凍先着厚啲，勢估唔到咁樣（曬）。」

佘詩曼憑《新聞女王》在亞洲電視大獎獲得視后寶座，阿佘開心指：「事隔十幾年，攞一個獎都唔易，好運加努力都有。但依家開緊戲，冇時間慶祝。」阿佘表示已開拍新劇《正義女神Themis》，並表示以為《新聞女王》難，估唔到新劇仲難，每日收工返屋企就係背劇本，之後問到古天樂到會否考慮開拍《新聞女王》電影版，點知佢口快快爆響口：「唔係我有冇興趣！係佢哋已經做緊。」