李佳芯搵男教練學打網球多年 問到對方靚唔靚仔過唔過電竟然咁答

李佳芯（Ali）今日（30/11）以頒獎嘉賓身份現身科學園出席慈善跑活動。Ali接受《香港01》訪問時表示：「以前我都有跑步嘅習慣，但發覺跑步後個人係瘦得好快，想唔瘦嘅地方都瘦埋，變咗我唔想太過骨感，我而家嘅習慣係打網球同埋玩瑜伽。（你有伴同你打網球？）有呀，之前洪永城話同我打，但最後得個講字，咁所以而家我係請男教練同我打。（男教練靚唔靚仔？）哈哈，我冇諗呢樣嘢，唔使問。（唔使你諗㗎，你會望到！）哈哈，我記憶之中係正常嘅男教練，我只係專心打網球，所以佢靚唔靚仔我係唔記得囉。（跟佢學咗幾耐？）21年學到而家。（你哋之間都已相處咗一段時間？）咁中間我都有搵過其他人學嘅。（對得耐覺得悶？）哈哈，其實我唔係咁樣諗囉，因為每個教練俾到自己嘅嘢都會唔一樣，開發知識都會唔同。」

被問到同教練朝夕相對會否產生過電？Ali害羞表示：「喂呀！可唔可以健康少少，呢個係健康節目嚟㗎，不過講真我又冇咁諗，因為我未試過。（教教吓就互生情愫！）暫時未試過，多謝。（想唔想試吓？暫時未試過，我唔知道。」