Marf@COLLAR為缺席謝票感內疚　睇錯醫生致嚴重瞓捩頸

邱彥筒（Marf )早前因缺席主演電影《寄了一整個夏天》謝票，而被指懶理票房，其後她撰文解釋自己最近患重感冒要臥床。Marf今午出席品牌活動時，亦有開腔為事件回應，她表示因睇錯醫生，搞到愈醫愈衰，出現嚴重瞓捩頸，現已康復七、八成，但她強調唔關最愛嘅「放血」事。「我有出現過兩次謝票場 ，但我當時戴口罩，我唔係好想戴口罩同大家影相，因為無咩意思。我知道佢哋係好開心，但我係fans的話我會想見到佢個樣，我知道佢哋買咗飛，所以我都幾內疚。」

Marf 又表示想開直播與fans交流，解答戲中問題，而提到電影場次愈來愈少，Marf 表示自己都有睇《破·地獄》，大讚作品精彩，但她對自己作品亦十分有信心。「最大得著係見到團隊努力，所以好希望佢哋努力大家見到。」Marf 表示之後仍然會有謝票。