胡定欣為造勢自爆戀情　分享喜悅扭扭擰擰要揀人嚟講

《巾幗梟雄之懸崖》進入結局周，胡定欣突然自爆有新戀情，今晚（21日）她出席宣傳活動時，講角色是滔滔不絕，又話唔捨得，但提到新戀情時，她只係笑笑表示「有機會再分享」，黎耀祥幫手「今次講晒下次講咩，而家做宣傳好難」，再問關於戀情事，胡定欣只係話「轉頭再講」。

胡定欣之後接受報紙訪問時言談甚歡，亦有分享新戀情。其後，她透過助手表示可以再做訪問，又解釋「唔知報紙會唔會問（戀情）」，完全龍門任佢擺。

胡定欣表示圈外男友拍拖一段時間，「胡說八道」成員已過目，亦替她感到開心。「因為唔使再煩住佢哋」。