何浩文做舞男被定型？ 《賭城》瀟灑哥有自信：已無人再叫我鴨王
「而家無人叫我做鴨王，改叫瀟灑哥。」何浩文(Dominic)自從憑《賭城群英會》打入屋之後，角色瀟灑哥已經深入TVB觀眾的心，鴨王這個名字亦慢慢從他身上洗去。不過這個瀟灑哥得來不易，2008年跟袁駿傑、喇英和楊尚斌組成跳唱組合Bro5以歌手身份出道，可惜歌唱事業沒有甚麼起色，繼而開始向電影方面發展。不過一直都未算好多戲做，工作量不多，早前還被傳媒拍得出入工廈，令人懷疑是否窮得要租住工廈。
何浩文接受《香港01》訪問時說：「工廈係我office嚟！練習呀剪片呀製作創作都喺嗰道！我又唔想返屋企就懶惰所以我就成日匿埋响我office，好少留喺屋企」其實Dominic出身自小康家庭，自少就不愁衣食，中五畢業後就遠赴英國留學，父親是教育局高官，媽媽亦是教師，可以說是書香世家。但他拍的電影題材多數比較走大膽路線，《喜愛夜蒲》三集都有佢份，《古惑仔：江湖新秩序》講黑社會，《微交少女》講援交，第一集擔正做男一的戲叫《鴨王》，好似無一套符合他本身的背景。他說：「兩年前都有訪問問過我屋企人支唔支持行呢條路，我當時聽完呢條問題就出於好奇試探過我屋企人，因為佢哋都係教育界嘅人，所以會想我再去讀書。不過隨住時間，佢哋見我有成績同知道我唔係玩玩吓，所以就慢慢越來越支持我。」雖然Dominic的開頭未必是最好，《鴨王》也未必十分正面，但正正憑這套電影而令到更多人認識他，繼而亦有機會進軍電視界。
其實Dominic並不是第一次跟TVB合作，在出道不久時便拍過TVB青春偶像電視電影《南華夢飛翔》擔任男主角，不過第一次拍長篇劇集就要等到今時今日，他說：「今次拍劇令我發覺同電影最唔同嘅地方係節奏，電視劇無論拍攝又或者係剪接出嚟嘅節奏都比電影要快。我未接觸劇之前一直都係鍾意電影多啲，不過拍完一部劇之後就兩樣都鍾意！」第一套劇就已經吸引不少人的目光，直情起埋「瀟灑哥」這個名號，看來終於可以搣甩「鴨王」這個稱號，不過其實他從不介意自己這個別名：「我唔怕被定型做『鴨王』，冇後悔過。因為每一個機會到面前嘅時候，唔去爭取唔去捉緊就唔知道幾時再有機會。要令自己無悔！更何況，現實中已經無人再叫我鴨王，改為叫我瀟灑哥。」Dominic現在已經簽約無綫電視部頭合約，亦開始拍攝無綫的綜藝節目，拍過３級片？有乜所謂！