袁文傑半月板撕裂忍痛開工多日完成戲份急入院動手術：軟骨磨蝕咗

袁文傑近年憑無綫處境喜劇《愛·回家之開心速遞》中飾演「潮偉」一角備受網民喜愛。早前他在社交平台分享一張在醫院的照片，見他手背上插有針管，而膝蓋上又有兩塊紗布，令不少圈中好友及網民擔心不已，紛紛送上祝福慰問。

袁文傑今日（12/11）現身電視城出席無綫處境喜劇《愛·回家之開心速遞》宣傳造勢活動，接受《香港01》訪問時表示：「其實我係做完運動之後過幾日，慢慢發覺膝頭有啲痛，覺得有啲唔對路，於是睇醫生照磁力共振，先發現我嘅半月板係撕裂咗，同埋啲軟骨都磨蝕得好犀利，醫生建議我做手術，但因為當時有劇要拍埋尾，變咗唔能夠即刻做手術，要忍痛開咗幾日工，拍晒之後就即刻入醫做手術。手術後係比之前係好咗好多，但康復程度又冇我想像中好得咁快，而家未知使唔使做物理治療，要觀察多兩個星期先知。（受傷呢段期間，太太皇帝式照顧你？）哈哈！咁又唔使，始終又唔係好嚴重，但入院做手術期間，我太太一直都留喺我身邊照顧，好多謝佢。」