「馮盈盈師姐」楊慧敏超豪過大禮　金豬牌流星錘龍鳳鈪放滿大廳

恭喜恭喜，挾馮盈盈師姐之名，先後參選港姐同「口罩小姐」的前港大校花楊慧敏（Mina），去年答允圈外男友求婚，近日進行傳統過大禮儀式，未婚夫為氹長輩歡心，準備充足，金器果籃海味擺到成屋都係，超多金器閃爆住場，Mina分享當日照片笑言：「王生終於落咗訂！」

楊慧敏興奮留言：「禮成，王生終於落咗訂，好多謝你同你屋企人咁錫我，所有嘢我都好鍾意。感謝咁多位兄弟姊妹嘅幫忙，過大禮非常成功。」楊慧敏又稱：「一直都係西式girl嘅我對於傳統嘅禮節真係完全唔識，好彩遇上大妗福好細心咁樣教導我哋每一部應該點做（原來成個過禮過程我同埋王生都係唔可以出現），每一個利是封應該入啲乜嘢，仲會打鑼打鼓非常熱鬧，過完大禮，就要派帖了，婚禮進入大直路，準備成為王太。」

照片中可見，過大禮物資放滿整個客飯廳，陣容相當誇張﹗各式各樣的參茸海味、生果兼發了芽的椰子，大批金器份量十足，一條巨型大豬牌鍊、多對龍鳳鈪，其中一對更是巨型流星錘，還有鑽戒和玉鈪，難怪Mina家人相當滿意笑得燦爛。