港女10人入餐廳7位冇幫襯　林秀怡同情老闆：人哋餐廳都要交租

辛苦搵來自在食，打工仔放假的消閒活動，莫過於約埋三五知己，或者一家大細出街食餐飯，心靈同肚皮雙雙滿足。但興致勃勃去到心儀餐廳，卻發現大排長龍，相信在等位的食客，都會萬眾一心齊齊用念力，希望「裡面班人快點食完走人啦」，而餐廳為怕客人齋坐不幫襯，亦往往設下最低消費，算是一家便宜兩家着的策略。但近日卻有港女為了20元的最低消費，將惠顧的食店圖文並茂Post上網鬧爆對方，皆因他們「十個人去食嘢，十分之三嘅人叫嘢食」，所以不應收每人20元的最低消費，語氣強硬，認為自己理據十足。

該名港女鬧長洲一間餐廳「不知所謂，做生意唔係咁做」，事緣他們一行十人惠顧該間餐廳，「好聲好氣」跟對方說「如果唔叫嘢食，可唔可以坐喺度」，想不到餐廳方面表示「每人最低消費20元先至可以坐喺度」，而該名港女即時嬲嬲豬，寸爆對方「我哋有啲人唔食嘢，每個俾返20元你」，在雙方各不相讓下，老闆的面色有幾難睇，可想而知。事件在網上瘋傳，巴打亦齊齊聲討該名港女的言行，「只要無恥就係無敵」、「去麥記冇最低消費」、「茶記燈油火蠟都係錢」，不少巴打更力撐餐廳老闆，建議不要做該名港女生意。

無綫藝人林秀怡，現時亦是旺角一間餐廳老闆，她接受《香港01》訪問，知悉該名港女「十人入座三人消費」事件，亦很同情該名餐廳老闆的不幸遭遇，「我間餐廳都有最低消費，咁正常人你都唔好意思，喺人哋間餐廳坐咁耐又唔食嘢啦。始終人哋餐廳都要交租，你又霸住咁多枱，人哋又做唔到生意，佢哋有返啲同理心就好喇。(如果妳的餐廳有相同遭遇呢？)最低消費咗咪算囉，如果佢坐成日，當我哋唔好彩，或者同佢哋講，我幫你埋咗張單先啦，希望佢哋自己識做。」

林秀怡表示以她的餐廳為例，下午及夜晚要番枱3至4次才可以維皮，若然遇上無賴食客坐足一晚，莫說賺錢，連維皮也有難度。「依家還可以，我哋餐廳又未試過遇到咁嘅人，可能我哋細間，嚟得嘅人都知我哋係小本經營，會勁好人同我哋講，食完啦快啲俾下一班客人啦。如果十個人入嚟齋坐一晚，我真係會嘔血，當我哋唔好彩囉，冇辦法，又唔可以趕人走架嘛，希望第日唔會遇到啦。」

不過林秀怡坦言這個月也少了返餐廳，皆因她自從《不懂撒嬌的女人》播畢後，近日也要忙於拍劇開工，「真係兼顧唔嚟，好彩我partner都仲可以做到，佢就變咗辛苦啲囉。依家拍緊綜藝節目《寵物大聯盟》，又有音樂節目啦、Big Big Channel啦，到9月會開劇，拍《是咁的，法官閣下》。劇裡面我係律師嚟嘅，會講我哋由學生開始，再出嚟做嘢，我就跟住黃智賢。」林秀怡千辛萬苦才開到餐廳，巴打如果幫襯就叫多點美食，謹記不要齋坐呀。