香港做Dancer窮到黐線？　舞蹈員健健跳足8年：試過月入得2000

做藝人搵食艱難個個都知，而同一個電視台內，還有其他人為了夢想在掙扎求存，藝員、配音員、PA的辛酸史聽得多，舞蹈員的慘況你又有冇聽過？
最近網上流傳一段AGA新歌《3AM》的MV，第一眼看似為是原裝正版的「Official mv」，後尾睇個題先知原來是「Dance Cover」，籌備這個MV的，其實就是這一班舞蹈員。

4個演出的男舞蹈員之中，其中一位是劉興健（健健），就咁講個名你可能唔知係佢係邊個，但如果我話他就是Viu TV《慳D啦Honey》入面和Rachel一對的健健，你或者會有點印象，但奇怪的是大家認識健健這個舞蹈員竟然是因為一個和跳舞無關的節目。

舞蹈員在舞台上總是表現得很專業，每個一舞步、表情全力做好，有人會羡慕他們的工作就是自己的興趣，但其實有苦自己知，健健接受《香港01》訪問時表示：「跳嘅舞都要睇客人，好多時要用好短時間去排舞，冇時間去雕琢一隻舞，有時又會做啲同跳舞冇關嘅嘢，或者冇錢又要做超支嘅嘢，永遠都會做多。」

在健健的眼中，跳舞的本質就是藝術，好希望香港會有更好的舞蹈作品，所以和另外3個舞蹈員張家麒（Ki Cheung）、林浩軒（Himtos）、梁徳忠（Tank Leung）用了6位數字做了這個MV，實踐在舞台上做不到的事：「我哋嘅工作包含好多藝術嘢，但你入行得耐就會盲目同滑啞，變咗唔會想自己創作啲嘢出嚟。」為了証明舞蹈員還有很多可能性，他們用心製作了拍得上原裝MV的作品。

拖糧無極限　開工瞓走廊

舞蹈員也是一個「手停口停」的行業，Freelance被「拍膊頭」低價「拜託」的事不時發生，工作量變數大亦令他們更加艱難，健健坦言：「試過半年入面，每個月得兩三單Job，月入得2000-3000蚊。」而其中一個最大的難題就是太遲出糧，例如一月出的騷，四月先出糧，若果中間幾個月都「失業」就大鑊喇。

做Freelance工作不穩定，但總有些請Full time舞蹈員的公司吧？健健初入行時就曾經在電視台工作過，想當年在電視台做Full time一個月月薪就只有6000元再加OT錢，一日開足三、四組（9個鐘為一組）冇得抖：「組接組冇得返屋企，要帶喼係公司瞓走廊，part time嘅話300蚊要做9個鐘，一樣係半年唔出糧，當初入行做到要問屋企人借錢返工，成半年冇糧出，同期個個都窮到黐咗線，但又唔知可以問邊個借錢，因為已經忙到冇晒生活圈子。」

但問到為何收入不穩定，又難關處處，健健都依然堅持？他直言：「當然我都唔可以代表晒所有Dancer去講依啲辛酸，但如果問點解我都仲做，就係我哋對跳舞都好有熱誠，同好鍾意跳舞。」看到這句你或者會覺得很「老土」，但這的確就是他們的理念，要不然也不會有這個MV。

花了八年時間在舞台上打滾，在健健和每一個Dancer的心裡面，最希望是將舞蹈這門藝術發揚光大，今次他們用盡積蓄做了一個MV，不是想做主角Show off，只是想証明舞蹈員的努力，可以為香港帶來更高質的作品，他最後感慨的說：「香港文化框框太細，依家跳緊嘅，好多時都係好耐好耐之前上網睇嘅嘢，有啲已經演變咗好多，但我哋好難將自己想做嘅元素擺上舞台，所以拍咗依條片，想大家知道香港都有好嘢。」