樂壇新人開騷索價$1280貴過天后?馬桶打卡兼改詞回應:880冇畀多
參加《全民造星IV》入行的何洛瑤(Sica)憑住日系和「白卡」路線殺出一條新血路,有「港版Ano」之稱,去年都捧走新人獎,更早過晒同屆的COLLAR成員開個人騷。日前她宣布將於12月5日在麥花臣場館舉行《The Wonder of sica 屎卡の奇幻旅程》,以飛航員打扮影海報,又將門票價位以機艙概念劃分為First class $1280(地面企位)、Business Class $1080(地面企位)、Economy Class $880 (地面企位/坐位) / Economy Light $680 (坐位)。
不過售價就令不少人譁然,雖然Sica講明First class可優先入場、享有官方周邊專屬排隊區以及5人一組的團體合照等「讓您每一刻均尊貴無比」的福利,但網民就說,過往的麥花臣本地歌手騷,門票最貴都只是$880,而今次音樂會票價更超越鄭秀文《You & Mi 鄭秀文世界巡迴演唱會》最貴門票$1,080;以及容祖兒《ANOTHER SIDE......JOEY.MY SECRET.LIVE》最貴門票$1,180。甚至乎,跟Sica同日開騷的日本歌手藤井風,其亞博演出最高票價都只是$1,099。不過都有人幫Sica講說話,指定價是由主辦單位決定,而且她的贊助商較少,所以門票訂價會高些少,又覺得「唔鍾意咪唔好買飛囉」。
其實Sica都曾經就定價解畫,她說:「齋睇係$880,你講的$1280係額外包埋其他項>_<?陸然我平時睇開的band show比起880係再平啲,但今次喺麥花臣,我真是想搞好多花臣 XD無論係人手上設計上定係其他東西都需要一定嘅成本,like今次請返嚟嘅live band我真係好鍾意,當然成本上都想慳得就慳>< like嚟緊的周邊我都係自己畫,希望你明白,我會好好努力練習對得住呢個價錢」
而為了令大家更明白,昨日她再將《天氣之女》改詞,剪了一個「MV」回應網民的聲音,其中都有貼出傳媒指她定價過高的報道,順道小劇透預告一下這個騷到底點解值這個價錢,Sica自稱「屎卡」並唱出:「年末又要 睇屎卡唱 聽屎卡跳 課全副家當 高質搞騷880並冇畀多 花臣多激唱にほんご 程度勁似睇mus fes喎 完全大混播 live band跳唱 mosh爆想更加狼 練結他笑著忙 重點:若買飛 必須開心課」臨尾她更在馬桶旁邊拎住張打格相影相,相信就是要呼應「屎卡」這個名。