吳志雄貼袁詠儀擁抱親密照被質疑有路　霸氣反駁：係我識阿靚先

吳志雄（大佬B)今日（14/10）現身尖沙咀出席「媽妹笑住唱PartII」演唱會發佈會。提到早前於社交平台分享與袁詠儀（阿靚）陳年舊擁抱親密照，隨即惹起網上熱議，有網民質疑二人有路，亦有網民抵死留言：「係咪向張智霖示威？」

大佬B就事件接受《香港01》訪問時霸氣回應：「要講呢個故事，唔知啲觀眾鍾唔鍾意聽。其實係我識阿靚先，後尾佢哋兩個先拍拖，後尾有一日，佢哋話去沙巴玩，於是就成大班人一齊去，當時丁子俊佢都係到。記得嗰日去到沙灘，我老婆都喺度，我就話落去游水先，阿靚就話自己唔游水，就叫我影張相先。呢張相就係咁發生，咁所以我哋係十幾年嘅朋友嚟，我哋關係係乜都冇，唔需要澄清嘅。我老婆同我47年，如果我有女人嘅，今時今日都好多，我都仲得嘅。不過我真係好多謝阿靚同Chilam（張智霖），因為我一生人都未見過Michael Jackson，就係佢哋兩公婆請我去台灣見佢，想喺呢度多謝佢哋兩個，我哋真係好好朋友。」