梁茵為慳錢搬返屋企住 直播怕出事會先查對方公司底蘊

梁茵自離巢後曾轉行做侍應，不過最終都係留守幕前，近年不時拍片、帶貨直播。今日她出席好友陳蕊蕊嘅茶飲店開幕時都話想開鋪做生意，但要拎一大嚿錢出嚟都十分需要勇氣。

梁茵表示目前以拍片為主，無論美妝、美食都唔放過 ，但由於競爭激烈，所以要突圍而出一啲都唔易。「之前有幫張彥博拍MV，而家要兼顧好多嘢，唯有經營好自己個YouTube 頻道，希望令觀眾認識自己。」梁茵又指離巢一段時間，初期喺接 job會比較吃力，目前仍在遖應中，提到收入方面，她表示要積谷防飢，因為變數太多。「慳錢大計係搬返屋企住，以前搬出去住私人空間多啲，但使費都大。搬返去住都唔慣，但呢個係最好嘅儲錢方法，屋企人都好體貼，會幫手執下啲雜物，有時做直播好多貨版。」

講到直播，梁茵表示會十分謹慎，尤其是有代言性質的話，而自己都會親自試用產品或查察對方公司。「有啲公司好難知道底蘊，最好都係搵多啲朋友問。直播有啲產品好多時都會搽到敏感，但因為每個人皮膚性質都唔同，但食品無得拗，真係要好小心。」